- Ousmane Demble ayaa dhaawac fudud soo gaaray kulankii ay guusha ka gaareen kooxda Arsenal
- Weerar yahanka kooxda PSG ayaa maanta oo khamiis ah fadhiistay tababarka kadib tijaabooyin la sameeyay
- Waa la nasin doonaa kulanka todobaadka Ligue 1 ee Strasbourg
wararka ciyaaraha Maanta
Kooxda Paris Saint-Germain (PSG) ayaa si taxaddar leh u ilaalinaysa gooldhaliyahooda ugu sarreeya Ousmane Dembele, kahor kulanka lugta labaad ee semi-finalka Champions League ee ay la ciyaarayaan Arsenal toddobaadka dambe.
Dembele ayaa soo bandhigay qaab ciyaareed cajiib ah tan iyo bishii December, isagoo xilli ciyaareedkan dhaliyay 33 gool isla markaana caawiyay 22 gool tartamada oo dhan.
Weeraryahankii hore ee Barcelona ayaa goolkii hore u dhaliyay PSG kulankii lugta hore ee ka dhacay Emirates Stadium, taasoo siisay kooxda Faransiiska faa’iido ay kula tagtay lugta labaad ee ka dhici doonta Parc des Princes.
Si kastaba, Dembele wuxuu ciyaaray kaliya 70 daqiiqo kulankii hore, kadib markii uu dhaawac uga baxay garoonka.
Warbixin uu qoray RMC Sport ayaa sheegtay in dhaawaciisu yahay “murqo xanuun fudud” (hamstring), taasoo sababtay in PSG ay si taxaddar leh ula tacaasho xaaladdiisa. Dembele, oo 27 sano jir ah, ma uusan ka qeyb galin tababarkii kooxda ee Khamiistii waxaana la filayaa inuusan qeyb ka noqon doonin kulanka horyaalka ee ay la ciyaarayaan Strasbourg dhammaadka usbuucan.
Hammiga weyn ee PSG ayaa ah in marka la gaaro Arbaco, uu Dembele si buuxda u nasto oo uu mar kale kooxda hoggaamiyo kulanka adag ee Arsenal.
Haddii Dembele laga waayo ciyaarta, waxay noqon doontaa fursad weyn oo u furan Arsenal, oo u baahan hal gool kaliya si ay ciyaarta ugu dhigto waqti dheeri ah.
Labada kooxoodba waxay raadinayaan guushoodii ugu horreysay ee Champions League. PSG waxay gaartay final-kii 2020 balse waxaa ka adkaaday Bayern Munich, halka Arsenal ay ciyaartay final-kii 2006, iyadoo hoggaanka haysay ilaa goor dambe oo ay Barcelona ciyaarta ka soo rogtay.