- Man Utd ayaa la kulantay guuldaradii 17-aad ee xilli ciyaareedka Premier League Axadii
- Ruben Amorim ayaa waji gabax kala kulmay booska 16-aad ee naadigiisa ee dhanka kala sareynta
- Tababaraha United ayaa su’aal galiyay mustaqbalkiisa, habdhaqanka ciyaartoydiisa iyo inay xitaa isku dayi karaan inay ku guuleystaan finalka Europa League
Tababaraha Manchester United Ruben Amorim ayaa si adag uga hadlay mustaqbalkiisa kooxda kaddib guuldarro xanuun badan oo 2-0 ah oo ay kala kulmeen West Ham.
United garoonka Old Trafford, taas oo ahayd guuldaradii 17aad ee Premier League xilli ciyaareedkan. Kani waa rikoor tiir leh oo aan laga arkin kooxda tan iyo xilli ciyaareedkii 1973/74 markaasoo ay kooxdu u dhacday heerka labaad.
Amorim ayaa sheegay in dhibaatada ugu weyn aysan ahayn tayada ciyaartoyda, balse ay tahay “dhaqanka kooxeed” ee hoos u sii jiidaya sumcadda weyn ee Manchester United. “Ma doonayo inaan ka hadlo ciyaartoyda, waxaan ka hadlayaa naftayda iyo dhaqanka kooxda,” ayuu yiri Amorim isagoo si cad u muujiyay inuu diyaar u yahay inuu banneeyo xilka haddii aan wax isbedel ah lagu sameyn kooxdiisa.
Tababaruhu wuxuu xusay inuu dareemayo ciyaartoy badan in aysan si dhab ah ugu diyaar garoobeyn kulamada horyaalka maadaama ay diiradda saareen finalka Europa League ee ay la ciyaarayaan Tottenham Hotspur. Amorim wuxuu sheegay in guusha finalka aysan waxba ka beddelaynin dhibaatada weyn ee kooxda haysata.
“Cabsidayda ugu weyn waa dareenka ah ‘waa caadi, booskeenna isma beddelayo’. Waxaa naga lumay dareenkii ahaa in guuldarro Old Trafford ka timaaddaa ay tahay masiibo,” ayuu yiri isagoo dhaleeceyn xooggan u jeediyay jawiga kooxda.
Ciyaaryahankii hore ee Manchester United, Aaron Wan-Bissaka, ayaa si aan toos ahayn uga qeyb qaatay labada gool ee ay dhaliyeen West Ham iyadoo difaacyada kale ee United aysan cadaadis saarin. Kooxda ayaa hadda fadhisa kaalinta 16-aad ee Premier League, taasoo ka dhigaysa xilli ciyaareedkii ugu xumaa muddo ku dhowaad 90 sano.
Inkasta oo guusha finalka Europa League ay si toos ah u siin doonto Manchester United tikidkii Champions League, hadana Amorim wuxuu sheegay in uusan hubin in kooxda ay diyaar u tahay tartankaas. “Ma hubo in ciyaarista Champions League ay tahay waxa ugu fiican,” ayuu yiri.
Waxaa la rumeysan yahay in maamulka Manchester United ay si weyn u qiimeynayaan mustaqbalka Amorim, iyadoo la filayo in haddii guuldarro kale timaado ama kooxda aysan isbeddel sameyn xagaaga, la filan karo in xilka laga qaado. Isaga laftiisa wuxuu sheegay in haddii “dareenkaan sii jiro”, aysan jirin sabab uu kooxda ugu sii negaado.