Wararka ayaa sheegaya in Wolves ay diideen dalabkii ugu horreeyay ee Manchester United ay ka gudbisay Matheus Cunha ka dib markii kooxdu ay codsatay inay lacagta ku bixiso shan qaybood.
Waxaa la filayaa in Cunha uu xagaagan ku biiro United heshiis qiimihiisu yahay £62.5 milyan – laakiin United waxay rajeyneysay inay bixiso £12.5 milyan sanadkii ilaa 2029.
Waxaa la rumeysan yahay in Red Devils ay kaliya haystaan miisaaniyad suuqa kala iibsiga oo dhan £100 milyan waxayna doonayeen inay lacag u helaan saxiixa ciyaartoy badan dhamaadka xilli ciyaareedka.
Wolves ma aysan dooneyn inay oggolaadaan qorshaha bixinta shan sano ah laakiin Sky Sports ayaa sheegtay in United ay haatan oggolaatay inay bixiso saddex qaybood laba sano gudahood.
Waxay la micno tahay in United ay buuxisay shuruudaha qandaraaska Cunha haatanna ay haysato oggolaansho ay ku dhammaystirto heshiiska isla markaana ay u bilaabi karto baaritaanka caafimaadka ka hor inta uusan u dhaqaaqin.
United ayaa ka walwacsaneed in Cunha laga yaabo inuu “ka niyad jabo” u dhaqaaqista Old Trafford ka dib markii kooxda Ruben Amorim ay ka hartay Champions League.
Si kastaba ha ahaatee, Cunha weli wuu ku faraxsan yahay inuu ku biiro United inkastoo ay guuldarro kala kulmeen finalka Europa League sababtoo ah wuxuu u arkaa inay yihiin mid ka mid ah kooxaha ugu waaweyn adduunka.
Tababaraha United Amorim ayaa ku faraxsan inuu soo dhaweeyo Cunha Old Trafford wuxuuna dareemayaa in kooxdiisu ay la soo wareegtay ciyaaryahan “qumman” qiimo “cadaalad ah”.
26 jirkaan ayaa qaab ciyaareed aad u wanaagsan ku jiray Wolves xilli ciyaareedkan, isagoo dhaliyay 15 gool wuxuuna caawiyay 6 kale 33 kulan oo Premier League ah.
Xiddiga reer Brazil ayaa inta badan ka ciyaara khadka dhexe ee weerarka laakiin sidoo kale waxaa loo adeegsan karaa weeraryahan labaad, weeraryahan dhexe, garab bidix iyo garab midig.
Cunha wuxuu joogay Wolves tan iyo 2023, isagoo kaga yimid Atletico Madrid, wuxuuna u saftay 92 kulan ilaa hadda isagoo dhaliyay 33 gool wuxuuna caawiyay 15 kale.
talkSPORT ayaa sheegtay in Cunha uu haatan ku heshiiyay heshiis shan sano ah United isla markaana uu doortay inuu xirto lambarka 10, oo haatan uu xirto Marcus Rashford.
Suuqa kala iibsiga xagaaga ayaa furmaya June 1, taasoo la micno ah in Cunha uu si rasmi ah u noqon karo ciyaaryahan United maalmo gudahood.
Daaficii hore ee United Phil Jones ayaa aaminsan in Cunha uu yahay saxiix weyn kooxdiisii hore. “Aad u fiican, aad baan u jeclahay,” ayuu Jones u sheegay OLBG markii la weydiiyay falcelintiisa ku aaddan imaatinka dhow ee Cunha.
“Waa ciyaaryahan aan laba jeer daawaday xilli ciyaareedkan isagoo ka horjeeda Manchester United wuxuuna si fiican uga soo baxay labada kulanba.
“Wax yar ayuu i xasuusinayaa Mousa Dembele, oo u ciyaaray Tottenham. Aad buu u xoog badan yahay marka uu kubadda wado waana awood badan yahay.
“Laakiin wuxuu leeyahay awood uu ku wareejiyo kubadda, uu ku dhaqaajiyo kubadda, uu ku helo baas, uu gool dhaliyo.”