Manchester United ayaa u furan dalabaadka xiddigooda khibradda leh ee mushaarka badan qaata Casemiro inta lagu guda jiro daaqadda kala iibsiga xagaagan, sida ay wararku sheegayaan.
Khadka dhexe ee reer Brazil oo 33 jir ah wuxuu jeebka ku shubtaa lacag ka badan, £350,000 toddobaadkii, ciyaaryahan kasta oo kale oo ka tirsan kooxda United ee hoos timaada Ruben Amorim.
Waxaa la rumeysan yahay in Red Devils ay leeyihiin miisaaniyad yar oo ay wax ku iibsadaan daaqadda kala iibsiga ee xagaagan, waxaana iibinta Casemiro ay ka caawin kartaa inay hesho lacag.
Casemiro wuxuu hadda qandaraas kula jiraa United ilaa xagaaga 2026, iyadoo ay jirto fursad lagu kordhin karo heshiiskiisa hal sano oo kale. Laakiin The Telegraph ayaa ku warameysa in Casemiro uu ka tagi karo haddii koox kale ay dalab u soo gudbiso ka hor bilawga xilli ciyaareedka 2025-26.
Sannadkii hore, falanqeeye kubadda cagta Jamie Carragher wuxuu sheegay in Casemiro uusan mar dambe u fiicnayn United, waxaana uu kula taliyay inuu ka fekero inuu u dhaqaaqo horyaalka Saudi Pro League ama Major League Soccer (MLS) ee Mareykanka.
“Waa inuu ka fekeraa, ‘Waxaan u baahanahay inaan aado MLS ama Sacuudiga’ – si dhab ah ayaan u hadlayaa,” ayuu yiri Carragher. “Wuu gaboobayaa, dadka agtiisa ah waa inay u sheegaan tan waa inay joogsato. Wuxuu ahaa ciyaaryahan weyn. Anigu ma ihi heerka uu ninkaasi gaaray. Champions League, wuxuu u ciyaaray Brazil, wuxuu u ciyaaray Real Madrid.”
“Laakiin mar walba waxaan xusuustaa wax markii aan shaqada ka fadhiistay, waxaa jiray hadal aan mar walba xusuusto anigoo ciyaaryahan ah, ‘Ka tag kubadda cagta ka hor inta aysan kubadda cagtu ku tagin’.”
Casemiro oo loogu Amaanay Waxqabad “Cajiib Ah”
Bilowgii bishii hore, falanqeeye kale oo kubadda cagta ah Rio Ferdinand ayaa si gaar ah u amaanay Casemiro ka dib markii United ay 3-0 kaga badisay Athletic Bilbao lugtii labaad ee semi-finalka Europa League. “Uma maleynayo in Casemiro wax qalad ah sameeyay,” ayuu Ferdinand yiri isagoo ka hadlaya xiddiga heerka caalami ee Brazil. “Wuxuu ahaa mid cajiib ah caawa.”
“Aad ayuu u anshax wanaagsanaa. Dadku waxay ka hadlayeen in la iska diriyo, lugahiisii way tegeen iwm.”
“Laakiin waxaan kuu sheegayaa, wuxuu yimid markii ay u baahdeen.”
Casemiro oo Fariin Cad u Diray Man Utd Mustaqbalkiisa
Horaantii sanadkan, Casemiro wuxuu sheegay inuu ku raaxaysanayo nolosha United, wuxuuna doonayay inuu sii joogo kooxda ilaa dhammaadka qandaraaskiisa 2026. “Waa inaan sii wadaa wixii aan sameynayo, anigoo ixtiraam iyo waxbarasho badan leh,” ayuu u sheegay AS. “Dabcan waxaan jeclaan lahaa inaan ciyaaro wax badan. Ma garanayo ciyaaryahan aan doonayn inuu ciyaaro oo caawiyo.”
“Sidoo kale, waxaan jeclaan lahaa inaan kooxda ka caawiyo waqtigan. Waxaan wax ula dhaqmaa si ixtiraam leh asxaabteyda iyo guddiga farsamada. Iyo wax kasta oo ka sarreeya, waxaan ixtiraamaa United, koox aan aad ugu mahadcelinayo.”
“Weli waxaan qandaraaskeyga ka harsan yahay hal sano iyo badh, waxaanan jeclaan lahaa inaan halkan ku dhammaystiro Manchester. Halkan waan ku raaxaystaa, qoyskaygii sidoo kale. Way la qabsadeen, Ingiriis ayaan ku hadalnaa.”
“Aad ayaan ugu mahadcelinayaa taageerayaasha Old Trafford iyo kooxda. Waan ku faraxsanahay heerka kooxda.”