Paris Saint-Germain ayaa si weyn u burburisay Real Madrid, kuna xasuuqday 4-0 kulan ka tirsan semi-finalka Club World Cup, taasoo u xaqiijisay inay u gudubto finalka.
PSG ayaa gacanta sare lahayd bilowgii ciyaarta. Thibaut Courtois ayaa laba badbaadin oo muhiim ah sameeyay horaantii ciyaarta, laakiin waxba kama qaban karin si uu uga hortago laba qalad oo aad u xun oo ay sameeyeen Raúl Asencio iyo Antonio Rüdiger, kuwaas oo keentay in Fabián Ruiz iyo Ousmane Dembélé ay laba gool u dhaliyaan Parisians 10 daqiiqo gudahood.
Real Madrid ma aysan helin wax jawaab ah oo ay uga jawaabto weerarka degdegga ah ee PSG, waxaana Ruiz uu dhaliyay goolkiisii labaad, iyo goolkii saddexaad ee kooxdiisa, ka hor inta aysan saacaddu gaarin 30 daqiiqo qeybtii hore.
Saddexda gool ee qeybtii hore iyo maamulka buuxa ee PSG ayaa ku filnaaday. Kooxda heysata Champions League ayaa si raaxo leh u maamuleysay qeybtii labaad, waxaana Luis Enrique uu bilaabay inuu bixiyo qaar ka mid ah ciyaartoydiisa muhiimka ah si ay u nastaan oo ay diyaar u noqdaan finalka.
Kooxda Xabi Alonso sidoo kale waxay is dhiibtay markii uu daqiiqado siiyay saaxiibkiisii hore iyo halyeeyga Real Madrid Luka Modrić kulankiisii ugu dambeeyay ee kooxda. Dani Carvajal sidoo kale wuxuu soo galay ciyaarta si uu u ciyaaro daqiiqadihiisii ugu horreeyay tan iyo markii uu dhaawac soo gaaray Oktoobar 25, 2024.
PSG ayaa ku darsatay goolkii ugu dambeeyay ee bandhigooda cajiibka ah markii Bradley Barcola uu si degan kubad ugu dhiibay Gonçalo Ramos kaasoo dhaliyay goolkii afraad daqiiqaddii 87-aad. Kooxda Enrique ayaa mar kale caddeysay sababta ay ugu yihiin kooxda ugu fiican adduunka hadda, waxayna Axadda u galayaan finalka Club World Cup ee ay la ciyaarayaan Chelsea iyagoo ah kuwa ugu cadcad.