Warar gaar ah ayaa xaqiijinaya in Liverpool ay qaaday tallaabo muhiim ah, iyagoo dalab rasmi ah ka gudbiyey weeraryahanka Eintracht Frankfurt ee Hugo Ekitike.
Dalabkan ugu horreeyay ee Liverpool ayaa waxaa diiday kooxda Jarmalka, iyagoo u sheegay inay doonayaan lacag intaas ka badan. Si kastaba ha ahaatee, diidmadan ma ahan mid soo afjaraysa wadahadallada, waxaana loo arkaa mid lagu furayay gorgortanka rasmiga ah, waxaana la filayaa in wadahadalladu ay sii socdaan.
Qaybta ugu muhiimsan ee warkan ayaa ah in Liverpool ay horey u heshay ogolaanshaha buuxa ee ciyaaryahanka. Hugo Ekitike ayaa la sheegay inuu “HAA” yiri, wax dhibaato ahna uusan ku qabin heshiiska shaqsiga ah ee Liverpool. Rabitaankiisa cad ee ah inuu ku biiro LFC wuxuu siinayaa Liverpool awood weyn oo dhanka gorgortanka ah.
Iyadoo ciyaaryahanka uu diyaar yahay, diiradda ayaa hadda la saarayaa sidii qiimaha loola meel dhigi lahaa Eintracht si loo dhameystiro heshiiska uu ciyaaryahanku aadka u doonayo.