Isagoo ku sugan Chicago oo ay kooxdiisu ku qaadanayso safarkooda isku diyaarinta xilli ciyaareedka ee Maraykanka, tababaraha cusub ee Manchester United, Ruben Amorim, ayaa bixiyey waraysi dheer oo uu kaga hadlay arrimo badan oo muhiim u ah kooxda.
Wuxuu fariin adag u diray kooxda ciyaartoyda bixitaanka doonaya, sida Alejandro Garnacho. Amorim wuxuu sheegay inuu fahamsan yahay in kooxaha doonaya ay sugi karaan daqiiqadda u dambaysa ee suuqa, laakiin wuxuu uga digay, “waxay la kulmi karaan lama filaan.” Wuxuu sidoo kale cadaadis saaray ciyaartoyda laftooda, isagoo yiri, “Haddii aad rabto inaad ciyaarto Koobka Adduunka ee sanadka dambe, waa inaad ciyaartaa,” taasoo u muuqata dhiirigelin ah inay si degdeg ah kooxo cusub u helaan.
Dhinaca kale, wuxuu si weyn u ammaanay saxiixyada cusub ee kooxda sida Matheus Cunha iyo Bryan Mbeumo. “Runtii waan ku faraxsanahay, aad ayay muhiim u tahay in ciyaartoyda cusub la helo sida ugu dhakhsiyaha badan,” ayuu yiri. Wuxuu carrabka ku adkeeyay in khibraddooda Premier League ay tahay “wax aad u muhiim ah” iyo inuu ku faraxsan yahay inay doorteen United inkastoo ay “heysteen fursado Champions League ah.”
Weeraryahanka cusub ee Matheus Cunha ayaa isna ka hadlay dareenkiisa: “Si fiican ayaa naloosoo dhoweeyay, taasina wax badan ayay kaa caawinaysaa. Waxaan dareemayaa inaan si buuxda ula qabsaday taatikada.”
Amorim wuxuu sidoo kale si gaar ah u xusay Kobbie Mainoo, isagoo ku tilmaamay “hibo weyn” laakiin wuxuu sheegay inuu u baahan yahay inuu “kordhiyo xawaarihiisa.”
Gabagabadii, tababaruhu wuxuu qiray inay wajihi doonaan xilli adag, isagoo yiri, “Waan dhibtoon doonnaa,” laakiin wuxuu adkeeyay in “dareenka kooxda uu yahay mid wanaagsan” ayna muhiim tahay in la dhiso isku xirnaan.