Kadib heshiiskiisii amaahda ahaa ee uu kaga yimid Manchester United, Marcus Rashford wuxuu saftay kulankiisii ugu horreeyay ee aan rasmiga ahayn ee Barcelona maanta oo Axad ah, isagoo ciyaaray qaybtii labaad ee guushii 3-1 ahayd ee ay kooxdu ka gaartay naadiga reer Japan ee Vissel Kobe.
Xiddiga reer England waxaa la soo geliyey qaybtii labaad isagoo ka mid ahaa 11 beddel oo uu tababare Hansi Flick sameeyay, wuxuuna soo bandhigay ciyaar “firfircoon” oo “rajoleh” isagoo ka ciyaaraya garabka bidix. Wuxuu muujiyey calaamado muujinaya tayada uu kusoo kordhin karo kooxda.
Inkastoo ay ahayd ciyaar “ku sigashooyin” badan, Rashford wuxuu muujiyey tayadiisa. Wuxuu si cajiib ah u kontrolay kubbad dheer oo uu ka helay Marc Casadó, wuxuuna ku sigtay inuu abuuro fursad gool loo fishay oo uu u baasay Robert Lewandowski. Isaga laftiisuba wuxuu helay fursad uu ku dhalin karo laakiin si fiican uguma aysan suurtagelin.
Waxa ugu muhiimsan, Rashford wuxuu door muhiim ah ka ciyaaray goolkii labaad ee guusha u horseeday Barcelona. Isagaa bilaabay dhaqaaqa isagoo si xariifnimo leh gudaha usoo galay, wuxuuna kubbad si sax ah ugu baasay Lewandowski, kaasoo isna u dhiibay Roony Bardghji oo goolka dhaliyey.
Kadib doorkiisii muhiimka ahaa, tababare Hansi Flick ayaa garoonka ka saaray 15-kii daqiiqo ee ugu dambeeyay si loo maareeyo taam ahaanshihiisa.
Inkastoo uu garoonka dhexdiisa ku bilowday si wanaagsan, Barcelona waxay weli wajaheysaa caqabada ah inay si rasmi ah ugu diiwaan geliso horyaalka La Liga xaaladdooda dhaqaale awgeed. Rashford wuxuu heli doonaa fursado kale oo uu isku muujiyo, iyadoo la filayo inuu ciyaaro kulanka xiga ee ay Barcelona la ciyaari doonto FC Seoul maalinta Khamiista.