Xiddiga weyn ee kooxda Manchester City, Erling Haaland, ayaa ugu dambayn ka hadlay xafiiltan lama filaan ah oo muddo hoose ka dhex socday isaga iyo daafaca da’da yar ee kooxda Arsenal, Myles Lewis-Skelly. Loolankan oo isugu jiray hadallo iyo ficillo garoonka dhexdiisa ah.
Xafiiltanku wuxuu bilaabmay bishii Sebtembar ee sannadkii hore, markii ciyaar 2-2 ku dhammaatay kadib uu Haaland ku yiri tababaraha Arsenal Mikel Arteta “is-hoosaysii,” isla markaana uu su’aal ka keenay aqoonsiga Lewis-Skelly oo markaas saftay kulankiisii ugu horreeyay ee Premier League.
Afar bilood kadib, Lewis-Skelly, oo markaas noqday ciyaaryahan muhiim ah, ayaa gool ka dhaliyey guushii weyneyd ee 5-1 ahayd ee ay Arsenal ka gaartay City. Wuxuu u dabaal degay isagoo ku dayanaya qaabkii caanka ahaa ee Haaland, wuxuuna baraha bulshada soo dhigay sawir uu ku qoray, “Is-hoosaysii.”
Wareysi cusub oo uu siiyey majaladda Time, Haaland wuxuu ku adkaystay hadalkiisii hore, isagoo sheegay in is-hoosaysiintu ay tahay “mid ka mid ah waxyaabaha ugu muhiimsan.”
Waxa cajiibka ah, Haaland uma uusan muuqan mid ka xumaaday jeesjeeska Lewis-Skelly. “Haddii uu doonayay inuu daqiiqaddaas igu jeesjeeso, isaga ayay u taal,” ayuu yiri. Wuxuuna si geesinimo leh u qirtay guuldarradii maalintaas, isagoo raaciyey, “Waxay nagu badiyeen 5-1. Marka haa, way iga adkaadeen.”
Dagaalkan yare e hadalka ah wuxuu xiiso dheeri ah ku daray loolanka adag ee u dhexeeya labada kooxood ee ku tartamaya horyaalka. Taageerayaashu ma sugi doonaan waqti dheer cutubka xiga ee sheekadan, iyadoo Arsenal ay martigelin doonto Manchester City kulan weyn 21-ka bisha Sebtembar.