Kooxda Real Madrid ayaa si lama filaan ah u xaqiijisay inay ciyaari doonto hal kulan oo saaxiibtinimo oo kaliya xagaagan, iyagoo ku dhawaaqay safar ay ku tagayaan Austria halkaasoo ay kula ciyaari doonaan kooxda WSG Tirol maalinta Talaadada, 12-ka Agoosto.
Go’aankan ayaa yimid kadib markii ay markii hore kooxdu qorsheysay inaysan ciyaarin wax kulan isku diyaarin ah, sababo la xiriira ka qaybgalkoodii Club World Cup iyo rabitaankooda ahaa in ciyaartoyda la siiyo nasasho ku filan.
Real Madrid waxay horey uga codsatay maamulka horyaalka La Liga in dib loogu dhigo bilawga xilli ciyaareedkooda, laakiin codsigaas waa la diiday. Inkastoo la filayo inay racfaan ka qaataan go’aankaas, haddana waxay ku dhawaaqeen kulankan si ay ugu diyaar garoobaan xilli ciyaareedka.
Si loo yareeyo saameynta uu safarkan ku yeelanayo diyaar garowgooda, kooxdu ma yeelan doonto xero tababar oo ay ku gasho Austria. Waxay u safri doonaan maalinta ciyaarta, way ciyaari doonaan, waxayna isla markiiba kusoo laaban doonaan Spain.
Ujeeddada ugu weyn ee kulankan, oo ka dhacaya toddobaad kaliya ka hor furitaanka horyaalka La Liga ee ay la ciyaarayaan Osasuna 19-ka Agoosto, ayaa ah mid lagu dhisayo taam ahaanshaha jirka ee ciyaartoyda.
Kooxda WSG Tirol, oo ka mid ah kooxaha heerka koowaad ee Austria laakiin sanadkii hore u dagaallantay inay horyaalka ka harto, looma arko tartan weyn. Laakiin waxay fursad siin doontaa taageerayaasha inay arkaan kooxda Xabi Alonso hal mar ka hor inta uusan bilaaban xilli ciyaareedka rasmiga ah.