Kooxda Manchester United waxay kusoo gabagabaysay safarkeedii guulaha badnaa ee Maraykanka qaab ciyaareed aan la jeclaysan, iyagoo barbaro 2-2 ah la galay kooxda Everton kulankoodii ugu dambeeyay ee tartanka Premier League Summer Series ee ka dhacay Atlanta.
Qodobka ugu weyn ee ay taageerayaashu xusi doonaan wuxuu ahaa kulankii ugu horreeyay ee la wada sugayay ee saxiixa weyn ee xagaagan, Bryan Mbeumo. Weeraryahanka reer Cameroon wuxuu kusoo bilowday ciyaarta wuxuuna si degdeg ah saameyn u yeeshay, isagoo bixiyey baaskii xariifnimada lahaa ee keenay rigooradii furitaanka ee United.
Bruno Fernandes ayaa si degan rigoorada u dhaliyey si uu United hoggaanka ugu dhiibo. Laakiin Everton ayaa ciyaarta kusoo laabatay oo barbaraysay. Qaybtii labaad, Mason Mount ayaa dhaliyey gool qurux badan oo uu si shaqsi ah u dhisay si uu mar kale hoggaanka ugu dhiibo Red Devils. Si kastaba ha ahaatee, lix daqiiqo kadib, gool iska dhalis ah oo la yaab leh ayaa ciyaarta ka dhigay 2-2.
Ciyaarta kadib, tababare Ruben Amorim wuxuu ammaanay saxiixiisa cusub ee Mbeumo. “Si fiican ayuu u ciyaaray,” ayuu yiri. “Dabcan, wuxuu u baahan yahay inuu wax badan horumariyo… laakiin wuxuu noo noqon doonaa muhiim.” Wuxuu sidoo kale ammaanay dadaalka Mason Mount.
Inkastoo uu ammaanay shaqsiyaad, Amorim wuxuu si weyn u dhaliilay qaab ciyaareedka guud ee kooxda, gaar ahaan khadka dhexe. “Waan ku dhibtoonaynaa dhismaha ciyaarta,” ayuu qirtay, isagoo sheegay inay dhibaato kala kulmeen kubadaha dhaadheer.
Qiimayntii tababaraha ee ciyaarta waxay ahayd mid cad. Inkastoo safarku uu “aad muhiim u ahaa,” markuu ka hadlayay kulankan wuxuu si toos ah u yiri, “Weli shaqo badan ayaa noo hartay.”
Inkastoo United ay ku guuleysaty koobka Summer Series, kulankii ugu dambeeyay wuxuu ahaa mid digniin u ah kooxda ka hor bilawga xilli ciyaareedka.