Xilli ciyaareedka 2025–26 ee horyaalka Premier League wuxuu si rasmi ah u furmayaa caawa oo sabti ah, iyadoo kooxda horyaalka difaacanaysa ee Liverpool ay garoonkeeda Anfield ku martigelinayso kooxda Bournemouth kulanka ugu horreeya ee ololaha cusub.
Kooxda Reds ee uu hoggaamiyo Arne Slot waxay si weyn u doonaysaa inay guul ku bilaabato si ay isaga meyraan niyad-jabkii kasoo gaaray guuldarradii rigoorayaasha ahayd ee Community Shield ee usbuucii hore. Bandhigoodii liitay ee daafaca ee kulankaas ayaa ah mid ay doonayaan inay si degdeg ah u saxaan.
Taageerayaasha Anfield waxay caawa markii ugu horreysay si rasmi ah u arki doonaan kooxdooda cusub oo is beddeshay. Saxiixyada waaweyn ee xagaagan sida Florian Wirtz, Hugo Ekitike, Jeremie Frimpong, iyo Milos Kerkez ayaa dhammaantood la filayaa inay kusoo bilowdaan shaxda koowaad.
Dhanka kale, kooxda Bournemouth waxay wajaheysaa hawl aad u adag. Weligood kuma aysan badin garoonka Anfield, waxayna xilli ciyaareedka soo galayaan iyadoo daafacoodii la “jarjaray” kadib markii ay iska iibiyeen ciyaartoy muhiim ah. Waxaa sidoo kale ka maqan weeraryahano muhiim ah sida Enes Ünal iyo Justin Kluivert oo dhaawacyo qaba.
Shaxda la Saadaaliyey ee Labada Kooxood
- Shaxda Liverpool (4-2-3-1): Alisson; Frimpong, Konaté, Van Dijk, Kerkez; Szoboszlai, Mac Allister; Salah, Wirtz, Gakpo; Ekitiké.
- Shaxda Bournemouth (4-2-3-1): Petrović; Araujo, Diakité, Senesi, Truffert; Adams, Scott; Semenyo, Tavernier, Ouattara; Evanilson.
Saadaasha Ciyaarta
Inkastoo daafaca Liverpool uu weli shaki ku jiro, farqiga weyn ee u dhexeeya tayada labada kooxood, gaar ahaan dhanka weerarka, waa mid aad u cad. Kooxda Bournemouth aad ayay u daciifsan tahay dhaawacyo iyo iibka ciyaartoyda awgeed. Iyadoo weerarka cusub ee Liverpool ee ay hoggaaminayaan Wirtz iyo Ekitike ay doonayaan inay wacdaro ka dhigaan kulankoodii ugu horreeyay ee Anfield, guul raaxo leh oo ay gaaraan Reds ayaa ah natiijada kaliya ee macquulka ah.
Saadaal: Liverpool 3–0 Bournemouth