Tababaraha kooxda Arsenal, Mikel Arteta, ayaa qabtay shirkisii jaraa’id ee ugu dambeeyay ka hor kulanka furitaanka Premier League ee ay Axadda la ciyaarayaan Manchester United, wuxuuna bixiyey warar dhiirigelin leh oo ku saabsan taam ahaanshaha kooxdiisa.
Arteta ayaa si weyn u muujiyey sida uu ugu faraxsan yahay diyaar garowga kooxdiisa, isagoo yiri, “Aad ayaan u faraxsanahay, ma sugi karo. Waxay ahayd pre-season miro dhal ah. Kooxdu isbeddel weyn ayay samaysay, diyaar ayaana u nahay inaan bilowno.”
Warka ugu weyn wuxuu ahaa midka dhaawacyada. Tababaruhu wuxuu xaqiijiyey in Leandro Trossard, oo dhaawacmay kulankii Tottenham, uu “aad u fiican yahay” oo uu diyaar u noqon doono kulanka Axadda. Waxa kale oo uu xaqiijiyey in saxiixa cusub ee Martín Zubimendi uu taam yahay, sidoo kalena daafacyada Gabriel Magalhães iyo Jurrien Timber ay tababarka kusoo laabteen. Tani waxay ka dhigan tahay in ciyaaryahanka kaliya ee ka maqan kooxda koowaad uu yahay Gabriel Jesus.
Markii la weydiiyay haddii saxiixa cusub ee weyn, Viktor Gyökeres, uu diyaar u yahay inuu kusoo bilowdo, Arteta wuxuu ahaa mid taxaddar muujiyey laakiin rajo qaba. “Maalinba maalinta ka dambaysa wuu sii fiicnaanayaa… dareenku aad ayuu u wanaagsanaa, marka aan aragno waxaan Axadda samayno,” ayuu yiri.
Intaas waxaa dheer, Arteta wuxuu kashifay sheeko xiiso leh oo ku saabsan kabtanka kooxda. Wuxuu shaaca ka qaaday inuu ciyaartoyda ka codsaday inay u codeeyaan cidda ay kabtan u dooranayaan.
Natiijadu waxay ahayd mid aan muran lahayn. “Mas aafo weyn, boqol dhibcood oo waaweyn, qof walba wuxuu dooranayay isku qof, kaasoo ah Martin Ødegaard,” ayuu yiri Arteta. “Taasi waa calaamadda ugu cad ee aad heli karto oo ku saabsan sida ay dareemayaan.”
Iyadoo kooxdiisu ay ku dhowdahay inay si buuxda u taam noqoto, kalsoonida Arteta ayaa sareysa ka hor safarka adag ee Old Trafford.