Halyeeyga iyo gooldhaliyaha abid ugu sarreeya taariikhda Manchester United, Wayne Rooney, ayaa si weyn uga digay xaaladda qasan ee ka jirta kooxdiisii hore, isagoo aaminsan in “wax jaban yihiin” kadib hadaladii culusaa ee uu tababare Ruben Amorim ka yiri guuldarradii ceebta ahayd ee kasoo gaartay Grimsby Town.
Guuldarradaas naxdinta lahayd ee Carabao Cup-ka, Amorim wuxuu si adag u dhaleeceeyay ciyaartoydiisa, isagoo yiri, “Kooxdii fiicnayd ayaa badisay. Ciyaartoydii fiicnaydna waa laga badiyey,” taasoo si cad u muujinaysa inuusan u arkin inay koox ahaan u ciyaareen.
Rooney, oo ka hadlayay barnaamijkiisa BBC, wuxuu sheegay in hadalladaas ay yihiin calaamad halis ah. “Waxa ugu weyn ee walaaca leh waa in erayadii tababaruhu ay ahaayeen kuwo si weyn u dhaleeceynaya ciyaartoyda,” ayuu yiri Rooney. “Haddii uu tababarahaagu sidaas yiraahdo, wax baa jaban. Wax sax ma ahan.”
Halyeeyga United wuxuu sidoo kale walaac ka muujiyey cadaadiska weyn ee saaran Amorim. “Waan illownaa inuu yahay 40 jir, waa tababare da’ yar. Manchester United aad ayay uga duwan tahay meelihii uu horey usoo joogay,” ayuu sharraxay. “Waxay u muuqataa in tani ay ahayd meeshii uu ku jabay.”
Ugu dambayn, Rooney wuxuu soo bandhigay su’aal cabsi leh oo ku saabsan mustaqbalka kooxda. “Dhibaatada hadda na haysata waa, yuu noqon lahaa qofka doonaya inuu shaqadan qabto [haddii uu Amorim baxo]? Waa wax waali ah in la yiraahdo,” ayuu yiri.
Digniinta ka timid Rooney waa mid culus, waxayna muujinaysaa in dhibaatooyinka Old Trafford ay aad uga qoto dheer yihiin natiijooyinka garoonka oo kaliya.