Halyeeyga Liverpool, Jamie Carragher, ayaa sheegay inuu “la yaabay” in Manchester United ay maalintii ugu dambaysay suuqa la saxiixatay goolhaye Senne Lammens halkii ay ka dooran lahayd Emiliano Martínez.
Maamulka United ayaa la kulmay cadaadis xooggan oo ahaa inay xal u helaan dhibaatada goolhayaha, kadib bilowgii aan wanaagsanayn ee xilli ciyaareedka ee Altay Bayındır, kaasoo booska kala wareegay Andre Onana.
Loolankii Daqiiqaddii Dambe
Markii uu suuqu gabaabsi ahaa, Red Devils waxay liiskooda ku reebeen labo magac: da’yarka Royal Antwerp ee Lammens iyo goolhayaha ku guuleystay Koobka Adduunka ee Aston Villa, Martínez.
Wararka ayaa sheegayay in labada goolhayeba ay shuruudaha shaqsiga ah la heshiiyeen United, iyagoo si weyn u doonayay inay ku biiraan Old Trafford.
Si kastaba ha ahaatee, sida ay sheegtay BBC, falanqayn xogeed oo dhamaystiran oo ay United ku samaysay Lammens ayaa keentay inay doortaan 23-jirkan reer Belgium, kaasoo ay kula soo wareegeen £18.1 milyan. Warar kale ayaa sheegayay in diidmadii Jadon Sancho ee ahaa inuu si rasmi ah ugu biiro Villa ay qeyb ka ahayd sababtii uu u fashilmay heshiiska Martínez.
Falanqaynta Carragher
Isagoo ka hadlaya xaaladda, Carragher wuxuu qiray inuu la yaabay in Lammens uu ahaa ninka ugu dambeyn ku biiray United.
“Waxaan filayay in Emi Martinez uu imaan doono shalay [Isniin], gaar ahaan hadalkii Unai Emery ee ciyaarta kahor. Sidaas darteed, waan la yaabahay inaysan taasi dhicin,” ayuu yiri Carragher.
“Wiilkan reer Belgium [Lammens] waa iska cadahay inuu yahay goolhaye da’yar oo leh tayo weyn, waxaana la arki doonaa inta ay ku qaadanayso inuu galo kooxda.”
Wuxuu intaas ku daray: “Waxaan qiyaasayaa inay si degdeg ah u dhici doonto marka la eego qaab ciyaareedka labada goolhaye ee kale ee Manchester United. Laakiin waa goolhaye da’yar, wuuna u baahan doonaa waqti.”
Hadalkii Lammens
Ka dib markii uu qalinka ku duugay heshiis shan sano ah, Lammens wuxuu sheegay inuu “aad ugu faanayo” inuu ku biirayo Man United, isagoo ku tilmaamay “riyo rumowday.”