Wararka ciyaaraha maanta ee kasoo baxaya caasimadda Spain ayaa xaqiijinaya in daafaca khibradda leh ee Real Madrid, Antonio Rüdiger, uu garoomada ka maqnaan doono muddo dheer kadib dhaawac lama filaan ah oo soo gaaray.
Xabi Alonso ayaan ku darin daafacan reer Jarmal liiska 21-ka ciyaaryahan ee wajihi doona Real Sociedad Sabtida, taasoo kicisay gambaleelka digniinta. Daqiiqado kadib, Los Blancos waxay xaqiijisay in Rüdiger uu dhaawac ka soo gaaray muruqa lugta bidix.
Baaxadda Dhaawaca
Inkastoo aysan kooxdu shaacin muddo cayiman, warbaahinta COPE ayaa sheegaysa in Rüdiger uu garoomada ka maqnaan doono ku dhowaad seddex bilood. 32-jirkan wuxuu seegi karaa ilaa 17 kulan oo ay ku jiraan kulamada waaweyn sida Madrid derby, El Clásico iyo safarka Anfield ee Champions League.
Warkan ayaa yimid kadib markii Rüdiger uu 172 daqiiqo u saftay xulkiisa Jarmalka intii lagu jiray kulamadii caalamiga ahaa ee bishan, isagoo u muuqday inuu si nabad ah uga soo baxay.
Dhibaatada sii Kordheysa ee Madrid
Tani waa dhibaato kale oo soo wajahday Rüdiger oo dhawaan kasoo laabtay dhaawac jilibka ah oo uu ku seegay dhammaadkii xilli ciyaareedkii hore. Wuxuu hadda kusoo biirayaa liiska dhaawacyada dheer ee Real Madrid oo ay horay ugu jireen Jude Bellingham, Endrick, Eduardo Camavinga iyo Ferland Mendy.
Dhaawacan ayaa culeys weyn saari doona daafaca kooxda, maadaama Rüdiger uu ahaa keyd muhiim ah oo nasin lahaa daafacyada dhexe ee Dean Huijsen iyo Éder Militão. Hadda, labadaas ciyaaryahan waxaa saaran doona culeyska ah inay ciyaaraan daqiiqado badan bilooyinka soo socda, iyadoo David Alaba iyo Raúl Asencio aysan qaab ciyaareed fiican ku jirin.