Kooxda Real Madrid ayaa sii wadatay bilowgeeda boqolkiiba boqolka ah ee horyaalka La Liga kadib guul ay ka gaartay Real Sociedad, laakiin guushaas waxaa hareeyay kaar cas oo muran dhaliyay oo la siiyay daafaca Dean Huijsen.
Saxiixa cusub ee xagaagan ayaa qalad ku galay Mikel Oyarzabal meel ka baxsan xerada ganaaxa, taasoo keentay in garsoore Jesús Gil Manzano uu si toos ah u siiyo kaar cas. Go’aankan ayaa si weyn uga xanaajiyay tababare Xabi Alonso iyo shaqaalihiisa.
Muxuu Muranku ahaa?
Muranku wuxuu ka dhashay in Éder Militão uu u muuqday inuu garab taagnaa Huijsen, taasoo meesha ka saaraysa inuu ahaa ninkii ugu dambeeyay. Sidoo kale, falka wuxuu ka dhacay meel 40 mitir u jirta goolka. Si kastaba ha ahaatee, garsooraha kumaba uusan laaban shaashadda VAR si uu u eego dhacdada.
Jawaabta Xabi Alonso
Isagoo ka hadlayay shirkiisa jaraa’id ee ciyaarta kadib, Alonso wuxuu sheegay inuu la hadlay garsooraha, laakiin sharaxaaddii uu ka bixiyay dhacdada aysan ahayn mid “qancisa.”
“Dareenka Huijsen wuxuu ahaa mid isku jira carood iyo farxad guusha kooxda darteed,” ayuu yiri Alonso.
“Aniga ahaan, wuxuu ahaa jaale sababtoo ah Militao wuu ag dhawaa, kubbaddu ma uusan koontaroolayn [Oyarzabal], waxayna 40 mitir u jireen goolka.”
“Kadib markaan dib u daawaday, fikirkeygu isma beddelin. Garsooruhu sharaxaad ayuu i siiyay, mana aysan i qancin, marka halkaas ayaan ku deynaynaa. Wixii markaas ka dambeeyay, qaabkii ciyaartu wuu isbeddelay, anagoo ku dhowaad 60 daqiiqo ku ciyaaraynay hal nin oo naga dhiman.”
Ganaaxa Huijsen & Dhibaatada Daafaca
Huijsen, oo doortay inuusan si fagaare ah uga hadlin dhacdada, ayaa la filayaa in la ganaaxo labada kulan ee soo socota ee La Liga, kuwaasoo ay la ciyaarayaan Espanyol iyo Levante.
Ganaaxan wuxuu kusoo beegmayaa xilli ay Real Madrid dhibaato daafac ka haysato, iyadoo uu dhaawac ku maqan yahay Antonio Rüdiger. Tani waxay ku qasbi doontaa Alonso inuu isbeddel ku sameeyo kooxdiisa si uu u ilaaliyo guulihiisa xiriirka ah.