Kooxaha Chelsea iyo Brentford ayaa ku kala baxay barbaro 2-2 oo xamaasad lahaa, kaasoo soo xiray kulamadii Sabtida ee horyaalka Premier League, inkastoo Blues ay dadaal weyn u gashay inay guul kasoo laabasho ah gaarto.
Enzo Maresca ayaa shaxdiisa kusoo bilaabay saxiixa cusub ee Facundo Buonanotte, si uu u siiyo fursad uu isla markiiba isku muujiyo.
Qorshihii Brentford ee Guuleystay
Labada kooxoodba way is baareen bilowgii ciyaarta, laakiin Brentford oo uu hoggaaminayay Keith Andrews ayaa la timid qorshe shan daafac ah si ay u ceejiyaan weerarka Chelsea, ayna weerar rogaal celis ah ku qaadaan.
Qorshahoodu wuu u hirgalay daqiiqaddii 35-aad. Weerar rogaal celis ah oo degdeg ah ayuu Kevin Schade kubbad halis ah ku helay, waxaana laadkiisii uu ku leexday daafaca Tosin Adarabioyo, isagoo dabamariyay goolhaye Robert Sánchez.
Soo Laabashadii Chelsea ee Qeybta Labaad
Tababaraha Chelsea wuxuu sameeyay seddex beddel waqtigii nasashada, isagoo soo geliyay Marc Cucurella, Reece James iyo Tyrique George.
Si kastaba ha ahaatee, waxay ahayd markii la soo geliyay Cole Palmer daqiiqadii 61-aad markii ay heleen goolka barbaraha. Wuxuu ahaa goolkiisii ugu horreeyay ee aan rigoore ahayn tan iyo bishii Janaayo.
Moisés Caicedo ayaa u muuqday inuu ciyaarta dilay markii uu hoggaanka u dhiibay Blues daqiiqadii 85-aad, isagoo sheekada dhan beddelay.
Daqiiqaddii 94-aad & Qalbi Jabkii Blues
Laakiin waxaa weli sheekada ku harsanaa waji kale. Daqiiqaddii 94-aad, kubbad la soo tuuray oo dheerayd ayuu madaxa ku sii taabsiiyay Kristoffer Ajer, waxaana si qurux badan u dhameystiray Fabio Carvalho oo ku sugnaa birta ka fog.
Ciyaarta ayaa kusoo dhammaatay 2-2, iyadoo dhibcaha la qeybsaday. Waa barbarihii labaad ee Chelsea ay gasho afar kulan oo ay ciyaartay xilli ciyaareedkan.