Xiddiga joogtada ah ee Manchester City, Erling Haaland, ayaa dhaliyay goolkiisii 50-aad kulankiisii 50-aad ee Premier League ee garoonka Etihad Stadium, isagoo soo bandhigay qaab ciyaareed cajiib ah oo ka dhan ah Manchester United kaasoo tababare Pep Guardiola ka dhigay mid la yaaban.
Wacdarihii Haaland
Qeybtii labaad ee ciyaarta oo aan 10 daqiiqo weli socon, Haaland wuxuu si jilicsan kubadda uga dul qaaday goolhaye Bayındır si uu u dhaliyo goolkiisii koowaad. 15 daqiiqo kadib, wuxuu mar kale helay kubbad, wuxuuna si degan u dhex dhigay shabaqa goolkiisii labaad iyo kii seddexaad ee City.
Labada gool ee Haaland ayaa ka dhigay inuu gaaro 50 gool oo Premier League ah oo uu ku dhaliyay garoonka Etihad 50 kulan oo kaliya. Kaliya Alan Shearer ayaa rikoodhkaas ku gaaray kulamo ka yar (47 kulan).
Amaanantii Guardiola
Rikoodhkan ayaa muujinaya sida uu Haaland u ahaa mid aan la joojin karin, laakiin Guardiola wuxuu ku adkeystay in xiddigiisu uu hadda galayo waji cusub oo qaab ciyaareed arxan daran ah.
“Erling wuxuu ahaa mid cajiib ah tan iyo bilowgii, laakiin xilli ciyaareedkan wuu ka fiican yahay sidii hore,” ayuu yiri tababaraha City isagoo amaanaya.
“Waxaan dhihi lahaa wuu ka fiican yahay sanadkii seddexleyda. Waa firfircoon yahay, aniguna kuma xukminayo fursadda uu qasaariyay, waxaan dooneynaa inuu goolal dhaliyo oo uu na caawiyo.”
Haaland wuxuu hadda leeyahay shan gool afartii kulan ee ugu horreysay ee xilli ciyaareedka cusub. Inkastoo ay adag tahay inuu barbareeyo rikoodhkii taariikhiga ahaa ee Dixie Dean (63 gool), haddana rikoodhkiisii casriga ahaa ee ahaa 36 gool oo Premier League ah hal xilli ciyaareed ayaa laga yaabaa inuu halis galo.