Kooxda Barcelona ayaa u muuqatay inay kusoo laabatay qaab ciyaareedkeedii ugu fiicnaa, iyagoo 6-0 ku kala dhigdhigay kooxda Valencia kulankoodii ugu horreeyay ee ay garoonkooda ku ciyaareen xilli ciyaareedkan.
Tababare Hansi Flick ayaa ku qasbanaaday inuu shax isku darsan oo ku meel gaar ah adeegsado, dhaawacyo iyo ganaax anshaxeed oo uu Raphinha ku saaray kursiga keydka awgiis. Si kastaba ha ahaatee, Barcelona si fiican ayay ciyaarta ku bilaabeen.
Qeybtii Hore & Goolkii Furitaanka
Ku adkeysigii Barça wuu miro dhalay. Daqiiqadii 29-aad, Pau Cubarsí ayaa baas qurux badan u dhex bixiyay Ferran Torres oo isna hal taabasho ugu sii dhiibay Fermín López oo xerada ganaaxa soo galay, kaasoo si degan u dhaliyay goolkii furitaanka ee Barcelona.
Duufaantii Qeybta Labaad
Barcelona lama celin karin qeybtii labaad, waxayna dhaliyeen shan gool oo kale.
Raphinha, oo beddel kusoo galay, ayaa shabaqa soo taabtay kadib caawin uu ka helay Marcus Rashford, taasoo ahayd caawintiisii ugu horreysay ee kooxda. Laba daqiiqo kadib, Fermín ayaa dhaliyay goolkiisii labaad ee ciyaarta, isagoo laad xooggan oo meel fog ah ka toogtay.
Burburkii Valencia wuu sii socday, qalad daafac oo kale ayaa kubadda u horseeday Raphinha oo isna dhaliyay goolkiisii labaad ee ciyaarta daqiiqadii 66-aad. Toban daqiiqo kadib, Dani Olmo ayaa kubbad u dhiibay Robert Lewandowski oo isna dhaliyay goolkii shanaad ee Barça.
Daqiiqaddii ugu qiirada badneyd ciyaarta waxay ahayd markii da’yarka La Masia ee Marc Bernal uu garoonka soo galay in ka badan hal sano kadib dhaawac ACL ah. Shan daqiiqo oo uu ciyaarayay, wuxuu caawiyay Lewandowski oo isna dhameystiray labadiisii gool, sidaasna kusoo xiray habeenkii quruxda badnaa ee Catalans-ka.
Guushan waxay kalsooni siin doontaa Barcelona kahor kulankooda Champions League ee ay la leeyihiin Newcastle United.