Kulankii ugu horreeyay ee Chelsea ee Champions League tan iyo 2023 wuxuu kusoo dhammaaday guuldarro, kadib markii kooxda Bayern Munich ay si xaq ah 3-1 ugu garaacday garoonka Allianz Arena.
Qeybtii hore oo xamaasad lahayd
Kadib bilow ay labada kooxoodba is dhaafsadeen fursado, kooxda martida loo ahaa ayaa heshay goolka furitaanka daqiiqadii 20-aad. Kubbad uu soo karoosay Michael Olise ayaa ku leexatay jilibka daafaca Chelsea ee Trevoh Chalobah oo iska dhaliyay.
Chelsea ayaa u muuqatay mid sii wareersan, waxaana xaaladdu kasii dartay markii Moisés Caicedo uu qalad ku galay Harry Kane xerada ganaaxa dhexdeeda. Kane ayaana si degan rigoorada u dhaliyay daqiiqadii 27-aad.
Laba daqiiqo oo kaliya kadib, markii ay u muuqatay in Chelsea ay gebi ahaanba burburayso, waxaa soo muuqday Cole Palmer. Weerar rogaal celis ah oo degdeg ah, ayuu Palmer kubbad si xawaare ah ula orday kahor inta uusan si qurux badan u dhaafin Manuel Neuer, isagoo rajo siiyay Chelsea.
Qaladkii dilay ciyaarta
Bayern ayaa ahayd kooxda ka wanaagsan bilowgii qeybta labaad, laakiin goolhaye Robert Sánchez ayaa sameeyay badbaadino dhowr ah. Si kastaba ha ahaatee, awoodda Bayern ayaa ugu dambeyn miro dhashay goolkoodii seddexaad. Qalad weyn oo uu sameeyay Malo Gusto ayaa kubadda saxan ugu dul dhigay Harry Kane, kaasoo si degan u dhameystiray goolkiisii labaad ee ciyaarta.
Wixii markaas ka dambeeyay, kooxda Enzo Maresca waxay u muuqdeen kuwo gebi ahaanba la qabtay, iyagoo awoodi waayay inay abuuraan fursado halis ah. Gool kale oo uu Palmer dhaliyay dhammaadkii ciyaarta ayaa la diiday kadib markii VAR ay ka eegtay garab-dhaaf (offside). Inkastoo goolkii Palmer uu rajo siiyay, guuldarradan ayaa ah mid cashar u ah kooxda Maresca oo ololaheeda Champions League ku bilaabatay qaab niyad jab leh.