Laba gool oo uu dhaliyay Kylian Mbappé ayaa kooxda Real Madrid oo naaqis ahayd ka caawisay inay guul 2-1 ah ka gaarto Marseille, iyagoo si guul ah ku bilaabatay ololahooda Champions League ee 2025-26.
Kooxda Xabi Alonso waxay kulankan soo gashay iyadoo uu cadaadis saaran yahay, waxaana tababaruhu uu dadka ka yaabiyay markii uu keydka geliyay Vinícius Júnior.
Dhibaatooyin Is-daba-joog ah
Real Madrid si xooggan ayay ciyaarta ku bilaabeen, laakiin xaaladdu si degdeg ah ayay u xumaatay markii Trent Alexander-Arnold uu dhaawac muruqa ah garoonka uga baxay shan daqiiqo oo kaliya markii ay ciyaartu socotay.
Intaas kuma aysan ekaan. Daqiiqadii 22-aad, Marseille ayaa hoggaanka qabatay. Kubbad uu lumiyay Arda Güler ayuu ka faa’iideystay Mason Greenwood kaasoo kubbad u dhiibay Tim Weah oo isna si qurux badan shabaqa u dhex dhigay.
Jawaabtii Mbappé & Kaarkii Casaa
Los Blancos jawaab ayay bixiyeen wax yar kahor nus saac markii Rodrygo lagu dhex riday xerada ganaaxa. Kylian Mbappé ayaana si degan rigoorada u dhaliyay, isagoo ciyaarta ka dhigay barbaro 1-1 ah.
Niyad jabkii Madrid ayaa sii socday qeybtii labaad. Daqiiqadii 70-aad, Dani Carvajal ayaa la siiyay kaar cas oo toos ah kadib isqabqabsi uu la galay goolhayaha Marseille. Waa kulankii labaad oo xiriir ah oo Real Madrid ay ku qasbanaato inay ku ciyaarto 10 nin.
Badbaadadii Daqiiqaddii Dambe
Markale, geesiga Real Madrid wuxuu noqday Kylian Mbappé. Orod degdeg ah oo uu sameeyay beddelkii Vinícius Júnior ayaa sababay in daafaca Marseille ee Facundo Medina uu kubadda gacanta ku taabto xerada ganaaxa dhexdeeda.
Mbappé ayaa mar kale u istaagay rigoorada daqiiqadii 81-aad, wuxuuna si kalsooni leh u dhaliyay goolkiisii labaad, isagoo sidaas ku xaqiijiyay guul aad u qaali ah oo ay gaartay kooxda Alonso.