Tababaraha Real Madrid, Xabi Alonso, ayaa qiray in Vinícius Júnior uu niyad jabsanaa kadib go’aankii uu keydka ugu geliyay kulankii furitaanka ee Champions League.
Rodrygo ayaa booska kala baxay kulankii Marseille, kaasoo kusoo dhamaaday guul 2-1 ah oo ay Madrid gaartay, laakiin Alonso wuxuu ku adkeystay in go’aanku ahaa kaliya mid la xiriira isku shaandheynta kooxda.
Si kastaba ha ahaatee, xaaladdu ma aysan caawinin Vinícius, kaasoo wajahaya cadaadis aad u weyn. Isagoo ku jira labadii sano ee ugu dambeysay qandaraaskiisa, wadahadalada heshiis kordhinta ayaa ilaa hadda ahaa kuwo aan raaxo lahayn, iyadoo madaxda kooxdu ay isweydiinayaan in qaab ciyaareedkiisu uu u qalmo mushaarka uu dalbanayo.
Dareenkii niyad-jabka ahaa
Xiisadaas ayaa u muuqata inay saameysay Vinícius, iyadoo Alonso uu xaqiijiyay inuusan markii hore ku jirin xaalad maskaxeed oo sax ah oo lagula hadlo go’aanka keyd gelintiisa, laakiin labadoodu ay hadda wada hadleen.
“Waxaan u maleynayaa inuu si fiican u shaqeynayo. Shalay [Arbaco], sida iska cad, ma ahayn waqtigii saxda ahaa ee lala hadlo,” ayuu sharxay Alonso. “Laakiin maanta [Khamiis], si kastaba ha ahaatee, si ka fiican ayuu u dhaqmayay, isagoo dhoola cadeynaya oo niyad wanaagsan.”
Wadahadalkii tababaraha
“Waxyar ayaan wada hadalnay, wax badan ma ahan; laakiin tababarka dhammaadkiisii, shaqo gaar ah ayaan la sameeyay. Wuxuu ku dhameystay isagoo dareen fiican qaba, aniguna sidoo kale.”
“Waxaan leenahay shan kulan oo horyaal ah oo kaliya. Weli waddo dheer ayaa harsan; waa marathon ilaa bisha Maajo. Marka waa inaan si tartiib ah u qiimeynaa. Waa inaan siinaa qof walba waqti: kooxda iyo ciyaartoyda shaqsiga ah.”
Alonso wuxuu difaacay xiddigiisa, isagoo ku adkeystay in qof kasta oo kooxda ka tirsan uu mas’uuliyad ka saaran yahay inuu caawiyo horumarkiisa. Hadallada Alonso waxay muujinayaan sida uu si taxadar leh u maareynayo xaaladda xiddigiisa, isagoo isku dayaya inuu dejiyo xiisadda isla markaana ilaaliyo midnimada kooxda xilli muhiim ah.