Kooxda Liverpool ayaa ilaashatay rikoodhkeeda boqolkiiba boqolka ah ee Premier League kadib markii ay 2-1 kaga adkaatay kooxda geesinimada muujisay ee Everton kulankii Merseyside derby ee galabnimadii Sabtida.
Kulankii 247-aad ee labadan kooxood ee isku magaalada ah wuxuu ku bilowday sidii la filayay, iyadoo Liverpool ay maamulaysay kubadda halka Everton ay daafac ku jirtay.
Qeybtii hore oo Reds ay awood badneyd
Natiijadu si degdeg ah ayay u muujisay sida loo kala awood badnaa, markii uu Ryan Gravenberch si xariifnimo ah u jabiyay is-mari-waagii. Xiddiga reer Holland ayaa kubbad qurux badan oo uu ka helay Mohamed Salah si fiican u dabamariyay goolhayaha.
Liverpool ma aysan dejin cadaadiska, waxayna ku abaalmariyeen dadaalkoodii markii ay labeysteen goolka hoggaanka. Hugo Ekitiké, oo kusoo bilowday booskii Alexander Isak, ayaa kubbad si degan u dhaafiyay Jordan Pickford, iyadoo Gravenberch uu markale caawin sameeyay.
Soo laabashadii Everton ee cabsida abuurtay
Rajadii Everton ee ahayd inay guul ka gaaraan Anfield ayaa u muuqatay mid dhammaatay, laakiin taageerayaashooda ayaa dib u soo noolaaday wax yar kahor saacaddii ciyaarta. Idrissa Gueye ayaa laad onkod ah ku toogtay goolka sare ee Alisson, isagoo ciyaarta ka dhigay 2-1.
Goolkaas kadib, Everton waxay dareemeen in daafaca Reds uu jilicsan yahay, waxayna sii kordhiyeen kalsoonidooda. Jack Grealish wuxuu ahaa mid dhibaato gaar ah ku hayay daafaca Liverpool, laakiin Toffees waxay ku dhibtoodeen inay fursadahooda u beddelaan kuwo iska cad.
Liverpool waxay u muuqatay mid aan degganeyn daqiiqadihii ugu dambeeyay laakiin waxay awood u yeelatay inay iska celiso kooxda martida ahayd ilaa dhamaadka, iyagoo sidaas ku xaqiijistay guushoodii lixaad oo xiriir ah tartamada oo dhan. Guushan waxay mar kale muujisay awoodda Liverpool ee ah inay natiijo hesho xitaa marka ay cadaadis saaran yahay.