Kooxda Real Madrid ayaa si cajiib ah uga soo kabatay guuldarradii ceebta ahayd ee kasoo gaartay Atlético Madrid, iyagoo 5-0 ku burburiyay kooxda Kairat Almaty kulan ka tirsan Champions League oo ka dhacay Kazakhstan. Habeenka waxaa si buuxda ula wareegay Kylian Mbappé oo dhaliyay seddexleey cajiib ah, taasoo xaqiijisay in kooxda Xabi Alonso ay labo guulood ka heshay labadii kulan ee ugu horreeyay ee Yurub.
Los Blancos waxay u safartay 4,000 mayl wax ka yar 24 saacadood kadib guuldarradoodii 5-2 ee Madrid derby, laakiin waxay muujiyeen awood maskaxeed oo sarreysa.
Bilow gaabis ah laakiin natiijo weyn
Inkastoo si weyn loogu saadaalinayay, Real Madrid waxay ciyaarta ku bilaabeen si gaabis ah, iyagoo u muuqday kuwo daalan. Kooxda martida loo ahaa ee Kairat Almaty waxay abuureen dhowr fursadood oo ay ku dhibaatayn kareen daafaca Madrid.
Si kastaba ha ahaatee, Real Madrid si tartiib ah ayay ciyaarta ugu soo laabatay, waxayna heleen goolkii furitaanka. Orod xawaare leh oo uu sameeyay Franco Mastantuono ayaa keenay in goolhayuhu uu qalad ku galo, taasoo keentay rigoore. Kylian Mbappé ayaana si degan u dhaliyay goolkiisii 11-aad ee xilli ciyaareedka daqiiqadii 25-aad.
Seddexleeydii Mbappé & wacdarihii Rodrygo
Qeybtii labaad, sheekadu waxay ahayd mid ku saabsan Mbappé. Weerar rogaal celis ah, kubbad dheer oo uu soo tuuray Courtois ayuu xawaarihiisa kaga faa’iideystay, wuxuuna si qurux badan kubadda uga dul qaaday goolhayaha. Daqiiqadii 73-aad, wuxuu dhameystiray seddexleeydiisii isagoo laad gantaal ah shabaqa ku hubsaday, waxaana goolkaas caawiyay beddelkii Rodrygo.
Rodrygo ayaa isna soo bandhigay qaab ciyaareed cajiib ah, isagoo sidoo kale caawiyay goolkii afaraad ee uu dhaliyay Eduardo Camavinga. Brahim Díaz ayaa isna gool ku daray waqtigii dhimashada si uu u dhameystiro sharafta.
Guushan weyn waxay ahayd jawaabta ugu fiican ee ay Real Madrid ka bixin kartay guuldarradii xanuunka badneyd ee derby-ga. Waxay muujisay awoodda maskaxeed ee kooxda iyo sida ay ugu tiirsan yihiin tayada Mbappé.
Qiimeynta ciyaartoyda Real Madrid (4-2-3-1)
(Qiimeynta waxaa laga soo xigtay FotMob)
- GK: Thibaut Courtois – 8.6
- RB: Raúl Asencio – 7.1
- CB: Dean Huijsen – 8.7
- CB: David Alaba – 7.3
- LB: Fran García – 7.5
- DM: Aurélien Tchouaméni – 7.4
- DM: Dani Ceballos – 7.8
- RW: Franco Mastantuono – 7.3
- AM: Arda Güler – 8.3
- LW: Vinícius Júnior – 6.6
- ST: Kylian Mbappé – 9.7