Laba kooxood oo waaweyn oo kalsoonidoodu ay hooseyso ayaa isaga hor imaanaya Stamford Bridge dhammaadka isbuucan, marka ay Chelsea martigeliso Liverpool kulan ka tirsan Premier League. Labada kooxoodba waxay si weyn u doonayaan inay guul gaaraan kahor fasaxa caalamiga ah ee soo socda, laakiin waxay muujiyeen jilicsanaan toddobaadyadii u dambeeyay.
Chelsea waxay guuldarreysatay seddex ka mid ah shantii kulan ee ugu dambeysay, halka Liverpool ay doonayso inay kasoo kabato labo guuldarro oo xiriir ah oo kasoo gaartay Crystal Palace iyo Galatasaray.
Goorta & goobta ay tahay ciyaarta?
- Goobta: London, England
- Garoonka: Stamford Bridge
- Taariikhda: Sabti, October 4, 2025
- Saacadda: 7:30 PM (Fiidkii) – Saacadda Geeska Afrika
Rikoodhka fool-ka-foolka ah
- Chelsea: 1 Guul
- Liverpool: 3 Guulood
- Barbaro: 1
- Kulankii Ugu Dambeeyay: Chelsea 3–1 Liverpool (May 4, 2025)
Warbixinta labada kooxood
Chelsea Tababare Maresca wuxuu shaaca ka qaaday inay ka maqan yihiin “toddobo ama sideed ciyaaryahan” dhaawacyo iyo ganaaxyo awgood. Maqnaanshaha ugu weyn waa Cole Palmer oo weli la tacaalaya dhaawac gumaarka ah. Dhanka daafaca, dhibaatadu way sii daran tahay, iyadoo ay ka maqan yihiin Tosin Adarabioyo, Wesley Fofana iyo Levi Colwill, waxaana intaas sii dheer ganaaxa Trevoh Chalobah.
Liverpool Warka ugu weyn ee Liverpool waa maqnaanshaha goolhaye Alisson oo la filayo inuu lix toddobaad garoomada ka maqnaado. Waa dharbaaxo weyn marka la eego qaab ciyaareedkiisii dhowaa. Si kastaba ha ahaatee, waxaa war wanaagsan ah in Federico Chiesa iyo Hugo Ekitiké ay labaduba tababarka kusoo laabteen oo ay diyaar noqon karaan.
Shaxaha la filayo (Predicted Lineups)
Chelsea (4-2-3-1): Sánchez; James, Badiashile, Hato, Cucurella; Caicedo, Fernández; Estêvão, Buonanotte, Neto; Pedro.
Liverpool (4-2-3-1): Mamardashvili; Bradley, Konaté, Van Dijk, Robertson; Gravenberch, Mac Allister; Salah, Wirtz, Gakpo; Isak.
Saadaasha ciyaarta
Marka la eego dhaawacyada Chelsea ee daafaca iyo qaab ciyaareedka daafac ee liita ee Liverpool ee dhowaanahan, kulanka Sabtida waxaa u badan in lagu go’aamin doono daaficii sameeya qaladaadka ugu yar. Labada kooxoodba waxay leeyihiin awood weerar oo cajiib ah laakiin midkoodna kuma faani karo daafac adag. Kulankan wuxuu imtixaan weyn ku yahay awoodda labada tababare ee ah inay xal u helaan dhibaatooyinka daafac ee kooxahooda.