Kooxda Sevilla ayaa soo afjartay abaar ku dhowaad toban sano ahayd oo aysan ka badin Barcelona horyaalka La Liga, iyagoo gaaray guul taariikhi ah oo 4-1 ah garoonka Ramon Sanchez Pizjuan. Guushan waxay ahayd mid si buuxda loogu qalmay, waxayna kashiftay daciifnimada daafac ee kooxda Hansi Flick, iyadoo rigoore uu qasaariyay Robert Lewandowski uu noqday mid sii xumeeyay habeenkii madoobaa ee kooxda reer Catalan.
Barcelona waxay kulankan soo gashay iyadoo ogayd inay guul ka gaarto Sevilla ay ka caawin doonto inay la wareegaan hoggaanka horyaalka, laakiin taa beddelkeeda waxay la kulmeen mid ka mid ah guuldarrooyinkoodii ugu xumaa sannadihii u dambeeyay.
Qeybtii hore oo Sevilla ay awoodda la wareegtay
Inkastoo Barcelona ay taariikh ahaan domineysay kulamadan, Sevilla waxay ciyaarta ku bilaabeen si cabsi la’aan ah. Daqiiqadii 13-aad, waxaa rigoore loo dhigay kadib markii VAR ay xaqiijisay in Araújo uu qalad ku galay Romero, waxaana si degan u dhaliyay Alexis Sánchez.
Daafaca sare ee Barcelona ayaa mar kale la ciqaabay daqiiqadii 36-aad. Kadib markii kubbad laga soo dafay Koundé, Ruben Vargas ayaa kubbad usoo dhigay Isaac Romero, kaasoo si fudud u dhaliyay goolkii labaad.
Si kastaba ha ahaatee, rajo ayaa usoo bidhaantay Barcelona waqtigii dheeriga ahaa ee qeybta hore, markii baas cajiib ah oo uu bixiyay Pedri uu si qurux badan u dhameystiray Marcus Rashford.
Rigooradii la qasaariyay & burburkii dambe
Qeybtii labaad, Barcelona waxaa loo dhigay fursad dahabi ah oo ay ciyaarta ku barbareyn kareen daqiiqadii 76-aad, laakiin Robert Lewandowski ayaa rigooradii ku dhuftay birta.
Waqtigii wixii ka dambeeyay, waxay ahayd ciqaab. Weeraro rogaal celis ah oo degdeg ah, Sevilla waxay labo gool oo kale ku dartay daqiiqadihii 90-aad iyo 90+6-aad, iyagoo kala dhaliyay José Ángel Carmona iyo Akor Adams.
Guuldarradan ceebta ah waxay dharbaaxo weyn ku tahay rajada Barcelona ee horyaalka La Liga. Kaliya ma ahan inay lumiyeen seddex dhibcood, laakiin habka ay u guuldarreysteen ayaa ah mid walaac weyn ku reebi doonta Flick.
Qiimeynta ciyaartoyda Barcelona
(Qiimeynta waxaa laga soo xigtay FotMob)
- GK: Wojciech Szczęsny – 5.2
- RB: Jules Koundé – 5.8
- CB: Ronald Araújo – 5.9
- CB: Pau Cubarsí – 6.9
- LB: Gerard Martín – 6.3
- CM: Frenkie de Jong – 6.6
- CM: Pedri – 7.2
- AM: Dani Olmo – 6.8
- RW: Ferran Torres – 6.2
- LW: Marcus Rashford – 7.3
- ST: Robert Lewandowski – 5.4