- Ter Stegen ayaa dhaawac halis ah ka soo gaaray jilibka tan iyo bishii Ogosto
- Goolhaye ayaa ku soo laabtay bedel aan la isticmaalin finalkii Copa del Rey
- Flick ayaa shaaca ka qaaday in Ter Stegen uu mar kale ciyaari doono usbuucan
wararka ciyaaraha Maanta
Tababaraha Barcelona Hansi Flick ayaa xaqiijiyay in Marc-Andre ter Stegen uu dib ugu soo laaban doono safka koowaad marka ay kooxdiisu la ciyaarayso Real Valladolid Sabtida.
Ter Stegen ayaa dhaawac halis ah kasoo gaaray jilibka bishii August 2024, taasoo keentay in Barcelona ay ku qanciso goolhayaha reer Poland Wojciech Szczesny inuu kasoo baxo howlgabnimadii uu horey ugu dhawaaqay si uu u buuxiyo booska. Hase yeeshee, Ter Stegen ayaa dib ugu soo laabtay tababarka dhowaan, wuxuuna kursiga keydka ku jiray kulankii final-ka Copa del Rey ee ay kooxda ka adkaatay Real Madrid.
Haatan oo uu si buuxda u caafimaaday, Ter Stegen wuxuu samayn doonaa kulankiisii 8-aad ee xilli ciyaareedkan isagoo kusoo bilaabanaya kulanka Valladolid.
“Wuxuu kusoo laaban doonaa berrito,” ayuu Flick u sheegay saxaafadda isagoo xaqiijiyay in Ter Stegen uu kusoo bilaaban doono kulanka.
Si kastaba, tababaraha ayaa ka gaabsaday inuu bixiyo dammaanad rasmi ah oo ku saabsan mustaqbalka Ter Stegen ama Szczesny inta ka dhiman xilli ciyaareedka, iyadoo Szczesny uu si aad ah u qanciyay intii uu ciyaarayay beddelka goolhayaha Jarmalka.
“Waxaan u maleynayaa inay fiican tahay in goolhayeyaasha la rogrogo,” ayuu yiri Flick. “Waa muhiim in Szczesny uu nasto oo uu soo kabto. Ter Stegen aad buu ugu fiicanyahay tababarka. Wuxuu diyaar u yahay inuu ciyaaro. Ma sii qorsheynayo wax ka badan kulanka Valladolid, kaasoo Ter Stegen u ciyaarayo. Wixii ka dambeeya lama ogaan karo.”
Ka hor kulanka Sabtida, Flick wuxuu sheegay inuu qorsheynayo inuu ciyaartoyda rogrogo si uu fursad u siiyo nasasho, maadaama ay si weyn isha ugu hayaan kulanka labaad ee semi-finalka Champions League usbuuca soo socda. Labada kooxood ayaa barbaro 3-3 ah ku kala baxay kulankii hore, sidaas darteed, kulanka lagu ciyaari doono Milan ayaa noqon doona mid go’aaminaya.
“Waa inaan raacnaa talada dhakhaatiirta si aan u ogaanno cida ciyaari karta,” ayuu yiri Flick. “Maalmo muhiim ah ayaa nagu soo socda, waana in si cad loo rogrogaa ciyaartoyda.”