- Inter ayaa u dagaalantay inay barbaro 3-3 ah la gasho Barcelona lugtii hore ee semi-finalka Champions League
- Weeraryahan Lautaro Martinez ayaa ka baxay qeybta nasashada ee ciyaarta muhiimka ah
- Ciyaaryahanka heerka caalami ee dalka Argentina ayaa la filayaa inuu seego kulanka soo laabashada
wararka ciyaaraha Maanta
Kooxda Inter Milan ayaa xaqiijisay in weeraryahankooda Lautaro Martinez uu dhaawac muruqa bowdada ah (hamstring) soo gaaray, taasoo ka dhigan in uusan u badnayn inuu ciyaaro kulanka lugta labaad ee semi-finalka Champions League ee ay la leeyihiin Barcelona Talaadada soo socota.
Martinez, oo xilli ciyaareedkan dhaliyay 21 gool tartamada oo dhan, lama arkin qeybtii labaad ee ciyaartii xiisaha lahayd ee 3-3 ku dhammaatay, taasoo isla markiiba dhalisay walaac ah in uu dhaawac culus soo gaaray.
Warbixinno kasoo baxay Talyaaniga ayaa sheegay in Martinez uu u baahan yahay “mucjiso” si uu ugu diyaar garoobo kulanka soo socda, waxaana hadda laga baqayaa in dhaawaciisu uu yahay mid weyn kadib markii Inter ay si rasmi ah u shaaciyeen.
Kooxda Inter ma aysan bixin waqti go’an oo uu ku soo kabsanayo, balse waxay sheegeen in si “maalinba maalinta ka dambeysa” loo qiimeyn doono xaaladdiisa, taasoo albaab u fureysa suurtagalnimada uu kaga qeyb gali karo kulanka Barcelona.
Xitaa haddii Martinez, oo shan kulan oo Champions League ah oo is xiga goolal ka dhaliyay ka hor lugtii hore, uu diyaar noqdo waqtiga ciyaarta Talaadada, waxaa la filayaa in kursiga keydka laga bilaabo, iyadoo in uu ciyaarta ku bilowdo ay tahay wax aan la maleyn karin waqtigan.
Labada kooxoodba dhaawacyo ayey la tacaalayeen kulankii hore – Barcelona waxay lumisay Jules Koundé qeybtii hore ee ciyaarta. Daafaca reer France si rasmi ah ayuu uga maqnaan doonaa kulanka labaad, waxaana la sheegay in uu garoomada ka maqnaan doono muddo 3 toddobaad ah.
Si kastaba ha ahaatee, Barcelona ayaa war wanaagsan heshay kahor kulanka, iyadoo tababare Hansi Flick uu xaqiijiyay in goob-ilaaliye Marc-André ter Stegen uu noqon doono goolhayaha koowaad kulanka Sabtida ee ay la ciyaarayaan Real Valladolid, taasoo noqon doonta ciyaartiisii ugu horreysay tan iyo bisha Agoosto.
Robert Lewandowski ayaa la tacaalaya si uu ugu soo laabto kulanka labaad ee Inter, halka sidoo kale la rajeynayo in daafaca bidix ee Alejandro Balde uu heli doono fursad uu ku ciyaaro qeyb ka mid ah ciyaarta.