Barcelona ayaa guuldarro kala kulantay kulankoodii ugu horreeyay ka dib markii ay ku guuleysteen horyaalka La Liga, iyadoo Villarreal ay 3-2 ku badisay, isla markaana noqotay kooxdii ugu horreysay ee Barcelona ka badisa horyaalka sanadka 2025.
Kooxda horyaalka difaacaneysa ayaa lagu soo dhaweeyay saf ciyaartoy oo hambalyeynaya (guard of honour), laakiin markii garsooraha uu yeeriyay bilowga ciyaarta, Villarreal ayaa si degdeg ah u joojisay dabaaldegyada. Kooxda martida ah ayaa ka faa’iideysatay difaaca sare ee Barcelona iyadoo Nicolas Pépé uu helay kubad uu goolka ku wajahnaa ka hor inta uusan u baasin Ayoze Pérez kaasoo si deggan u dhaliyay goolka furitaanka isla markaana aamusiiyay garoonka Estadi Olímpic Lluís Companys.
Daqiiqadihii ugu dambeeyay ee qeybta hore, Barcelona ayaa barbarreysay ciyaarta iyadoo laacibka da’da yar ee Lamine Yamal uu dhaliyay gool qurux badan oo kale. Xiddiga da’da yar ayaa soo dhex galay xerada ganaaxa hareeraheeda wuxuuna darbo qurxoon ku hubsaday geeska hoose, taasoo noqotay qaabkiisa caanka ah toddobaadyadii dhowaa. Wax yar ka hor nasashada, Fermín López ayaa xakameeyay kubad soo boodday wuxuuna ka baxsaday darbo xooggan oo ka baxsan xerada ganaaxa taasoo shabaqa gashay, isagoo dhameystiray soo kabasho kale.
Shan daqiiqo markay socotay qeybta labaad, Villarreal ayaa barbarreysay ciyaarta iyadoo Santiago Comesaña uu dhaliyay kubad dusha sare looga soo tuuray oo ka tagtay Marc-André ter Stegen isagoo aan waxba qaban karin.
Ciyaarta ayaa markaas noqotay mid aad u adag oo aan fursado badan oo gool dhalin ah la helin inta badan qeybta labaad. Iyadoo barbaro ay u muuqatay natiijada macquulka ah, Villarreal ayaa weerar ku qaaday. Kubad hoose oo la soo dhex mariyay ayaa gaartay Tajon Buchanan oo aan la ilaalinaynin xerada ganaaxa gudahiisa. Xiddiga heerka caalami ee Canada ayaa kubadda xakameeyay wuxuuna laaday darbo xooggan taasoo Villarreal hoggaanka u dhiibtay daqiiqaddii 80-aad.
Barcelona ayaa awoodi weyday inay soo kabasho kale sameyso, kooxda dhowaan horyaalka ku guuleysatay ayaa laga badiyay kulankoodii ugu dambeeyay ee gurigooda xilli ciyaareedkan. In kasta oo guuldarrada, kooxda Catalan iyo taageerayaashooda ayaa sii waday dabaaldegyadooda horyaalka markii garsooraha uu yeeriyay dhamaadka ciyaarta, iyagoo kor u qaaday koobka La Liga kulankii ugu dambeeyay ee Estadi Olímpic Lluís Companys ka hor inta aysan xilli ciyaareedka soo socda ku laaban Camp Nou.