Ololaha Liverpool ee ay ku doonayso saxiixa weeraryahanka Eintracht Frankfurt, Hugo Ekitike, ayaa galaya wejigiisii ugu dambeeyay. Kooxda ayaa la filayaa inay saacadaha soo socda gudbiso dalabkoodii labaad oo la aaminsan yahay inuu noqon doono kii heshiiska soo afjari lahaa.
Sida ay wararku sheegayaan, dalabkan cusub ayaa noqon doona mid isku darkiisu yahay €90 milyan. Wuxuuna ka kooban yahay €80 milyan oo lacag go’an ah iyo €10 milyan oo gunnooyin dheeri ah.
Dalabkan si weyn loo kordhiyey ayaa loogu talagalay in lagu qanciyo Eintracht Frankfurt, kadib markii ay diideen dalabkii hore ee Liverpool. Wararku waxay si weyn ugu kalsoon yihiin in dalabkan uu noqon doono mid ku filan in heshiiska lagu dhameystiro.
Iyadoo la ogyahay in ciyaaryahanka uu horey u ogolaaday inuu ku biiro Liverpool, dalabkan cusub ayaa loo arkaa tallaabadii ugu dambaysay ee lagu xaqiijinayo saxiixa mid ka mid ah weeraryahanada da’da yar ee loogu doonista badan yahay Yurub.