Tababaraha kooxda Chelsea, Enzo Maresca, wuxuu bixiyey fariin isku dhafan oo ammaan iyo digniin ah oo ku socota xiddigiisa da’da yar ee reer Brazil, Estêvão, kadib bandhig cajiib ah oo uu sameeyay kulankii ay kooxdiisu 5-1 ku burburisay West Ham Jimcihii.
18-jirkan, oo loo magacaabay xiddiga garoonka, wuxuu si lama filaan ah ugu soo bilowday ciyaarta kadib markii uu Cole Palmer dhaawac ku baxay is kulaynta. Inkastoo uu caawiyey goolkii Enzo Fernández, Maresca wuxuu si gaar ah u iftiimiyey qaladkii uu sameeyay ee keenay goolkii furitaanka ee West Ham.
“Waa ciyaaryahan da’ yar oo cajiib ah. Aad baan ugu faraxsanahay isaga,” ayuu yiri Maresca. “Laakiin waa inuu la qabsadaa, sababtoo ah goolkii nalaga dhaliyey wuxuu ka yimid isagoo isku dayaya inuu si qurux badan kubadda u taabto bartamaha garoonka.”
Dhanka kale, tababaruhu wuxuu sidoo kale kashifay faahfaahin ku saabsan dhaawaca Cole Palmer. Wuxuu qiray in xiddiga reer England uu horeyba ula tacaalayay dhaawac gumaarka ah maalmihii lasoo dhaafay.
“Kulankii Palace, 100% ma uusan ahayn laakiin wuxuu isku dayay inuu dadaal weyn sameeyo,” ayuu sharraxay Maresca. “Caawa wuu isku dayay, laakiin ma fiicnayn. Intii lagu jiray is kulaynta, wuxuu mar kale dareemay wax, marka waxaan doorbidnay inaanan ku soo bilaabin oo aanan halis gelin.”
Ugu dambayn, Maresca wuxuu si adag u beeniyey fikradda ah in kooxdiisu ay ku tiirsan tahay Palmer oo kaliya. “Kuwa yiraahda waxaan nahay ‘kooxda Cole’. Cole waa ciyaaryahankeena ugu fiican… Laakiin waxaan tusnay xilli ciyaareedkii hore markii uusan Cole 100% ahayn inaynaan gaarnay afarta sare,” ayuu si caro leh u yiri.