Tababaraha kooxda Manchester United, Ruben Amorim, wuxuu muujiyey dareen isku dhaf ah oo ammaan iyo dhaliil ah kadib barbarihii 1-1 ee ay kooxdiisu la gashay Fulham, isagoo qiray in kooxdiisu ay u baahan tahay inay noqoto mid “ka caqli badan” daqiiqadaha muhiimka ah ee ciyaarta.
Inkastoo uu ku faraxsanaa dadaalka guud, tababaruhu wuxuu si gaar ah uga xumaa sida ay kooxdiisu ula tacaashay ciyaarta kadib markii ay hoggaanka qabteen. “Markii aan goolka dhalinnay, waa inaynu samayno wax ka duwan: kubadda si fiican u haysanno, oo aan cadaadiska saarno kooxda kasoo horjeeda. Daqiiqaddaas caqli maanaan lahayn,” ayuu yiri Amorim.
Wuxuu intaas ku daray, “Goolka ka hor waan fiicnayn. Markii aan goolka dhalinnay, waxaan kaliya ka fikiraynay natiijada, waana illownay inaan samayno waxyaabihii caadiga ahaa.”
Markii la weydiiyay rigooradii uu qasaariyey kabtan Bruno Fernandes, Amorim wuxuu difaacay ciyaaryahankiisa. “Uma uusan baran inuu rigoore qasaariyo,” ayuu yiri. “Waxaan dareemay in intii ay ciyaartu socotay uusan faraxsanayn, sababtoo ah wuxuu dareemay in rigoorada uu qasaariyey ay anaga muhiimad weyn noo lahayd.”
Guud ahaan, tababaruhu wuxuu ammaanay dadaalka ciyaartoyda, isagoo sheegay inay si adag u shaqeeyaan toddobaadka oo dhan. “Aad baan ugu kalsoonahay inaan guulo badan gaari doonno,” ayuu kusoo gabagabeeyay, isagoo muujinaya kalsooni inkastoo ay heleen hal dhibic oo kaliya labadii kulan ee ugu horreeyay.