Isbeddel cajiib ah oo lama filaan ah, kooxda reer Spain ee Real Betis ayaa si rasmi ah bayaan usoo saartay, kuna xaqiijisay inay gebi ahaanba ka baxday heshiiskii ay kula soo wareegaysay xiddiga garabka ka ciyaara ee Manchester United, Antony. Burburkan ayaa yimid saacado yar kadib markii la sheegay in heshiis dhan £21.6 milyan la isku afgartay.
Kooxda La Liga ka dhisan waxay si cad u sheegtay in sababta ay heshiiska uga bexeen ay tahay awood darro dhaqaale oo ay ku buuxin waayeen dalabaadka waaweyn ee la xiriira heshiiska.
Bayaanka Betis wuxuu si toos ah u yiri: “Ma jiro wax heshiis ah, waxaana laabannay dalabkii aan gudbinnay sababtoo ah Real Betis ma awooddo kharashka iibka iyo lacagaha ay Manchester United [taas beddelkeeda] ku qasban tahay inay siiso ciyaaryahanka ka hor inta uusan heshiisku dhicin.”
Tani waxay si cad u muujinaysaa in dhibaatadu aysan ahayn oo kaliya qiimaha iibka ee United, laakiin ay sidoo kale la xiriirto mushaarka sare ee ciyaaryahanka iyo lacagta magdhowga ah ee uu ka doonayay United si uu heshiiskiisa u burburiyo.
Si kastaba ha ahaatee, dhanka Old Trafford, aragtidu way ka duwan tahay. Sida ay sheegtay The Daily Mail, Manchester United waxay aaminsan tahay in bayaanka Betis uu yahay “xeelad gorgortan” oo kaliya. Waxay aaminsan yiin in kooxda reer Spain ay weli si weyn u doonayso ciyaaryahanka, laakiin ay isku dayayso inay cadaadis saarto Antony si uu u yareeyo dalabaadkiisa shaqsiga ah.
Mustaqbalka Antony ayaa hadda mugdi ku jira. Heshiisku gebi ahaanba ma uusan dhiman, laakiin wuxuu hadda si buuxda ugu xiran yahay haddii uu Antony diyaar u yahay inuu tanaasul weyn ka sameeyo dhanka dhaqaalaha si uu u helo heshiiskiisa Spain.