Kooxda Real Madrid ayaa ka badbaaday kaarkii casaanka ahaa ee muranka dhaliyay ee la siiyay Dean Huijsen, waxayna xaqiijisatay guul 2-1 ah oo ay ka gaartay Real Sociedad, iyagoo sii watay bilowgooda boqolkiiba boqolka ah ee xilli ciyaareedka.
Inkastoo ay 10 nin ku ciyaarayeen, Los Blancos waxay awood u yeelatay inay hesho seddex dhibcood oo muhiim ah. Waa kan seddexdii arrimood ee ugu waaweynaa ee laga bartay kulankan.
1. Kylian Mbappé oo isha ku haya Pichichi kale
Miyuu jiraa xiddig kale oo La Liga ka ciyaara oo ka qaab ciyaareed wanaagsan Mbappé xilligan? Xiddiga reer France wuxuu soo bandhigayaa wacdaro mar kasta oo uu garoonka soo galo, wuxuuna mar kale ahaa geesiga kooxdiisa.
Mbappé wuxuu dhaliyay goolkii furitaanka ee ciyaarta, wuxuuna caawiyay goolkii guusha ee uu dhaliyay Arda Güler, isagoo labada jeerba dhibaato ku abuuray daafaca Real Sociedad. Afar gool ayuu hadda ka dhaliyay afar kulan, wuxuuna hoggaaminayaa tartanka Pichichi. Xilligan, qaab ciyaareedkiisu waa heer ka sarreeya inta kale ee La Liga.
2. Daciifnimada Daafaca oo Mar kale Dhibaato ku ah Real Madrid
Los Blancos waxay ku dhowaad xilli ciyaareedkii hore oo dhan la daalaa dhacaysay dhaawacyo daafac. Kooxdu waxay xagaagan la soo saxiixatay Huijsen, Carreras iyo Alexander-Arnold si ay dhibaatadaas u xalliyaan, laakiin waxay mar kale isku arkeen xaalad la mid ah.
Antonio Rüdiger wuxuu ku maqan yahay dhaawac seddex bilood ah, haddana Dean Huijsen wuxuu ganaax ku seegi doonaa labada kulan ee soo socda ee La Liga. Si lama filaan ah, Alonso waxaa laga yaabaa inuu ku qasbanaado inuu Tchouaméni ama Carvajal u adeegsado daafac dhexe.
3. Dani Carvajal oo aan si Fudud isku dhiibayn
Alonso wuxuu sii waday inuu isku beddelo Alexander-Arnold iyo Carvajal, iyadoo xiddiga reer Spain uu kusoo bilowday kulankan. Wuxuu soo bandhigay qaab ciyaareed weerar oo cajiib ah qeybtii hore, isagoo baasas qurux badan dhowr jeer siiyay Mbappé.
Inkastoo uusan lahayn awoodda baaska ee Alexander-Arnold, Carvajal wuxuu caddeeyay inuu weli si fiican ula shaqayn karo weerarka xiddiguhu ka buuxaan ee Madrid. Dhanka daafaca, wuxuu heerar ka sarreeyaa saaxiibkiisa cusub, inkastoo uu rigoore sababay qeybtii labaad. Alexander-Arnold ayaa laga yaabaa inuu yahay mustaqbalka Real Madrid, laakiin Carvajal si fudud uguma wareejinayo booskiisa.