Sugitaanku wuu sarreeyaa qeybtii ugu horreysay ee Manchester derby ee xilli ciyaareedkan, iyadoo Manchester City ay Axadda (maanta) garoonkeeda ku martigelinayso kooxda ay si weyn u xafiiltamaan ee Manchester United.
Kulankan taariikhiga ah marar dhif ah ayuu niyad jab noqdaa, waxaana la filayaa inuu noqdo mid si adag loogu tartamo. Natiijada ciyaarta waxaa go’aamin kara waxyaabo yaryar iyo loolamada shaqsiga ah ee garoonka dhexdiisa.
Waa kan afarta loolan ee fure u noqon kara maalinta Derby-ga.
1. Erling Haaland vs. Matthijs de Ligt
In la joojiyo Erling Haaland waa fikirka ugu horreeya ee tababare kasta oo tagaya Etihad. Matthijs de Ligt wuxuu u muuqdaa mid ku habboon inuu dhexda u galo daafaca seddexda ah ee United. Wuxuu leeyahay awoodda jireed iyo xawaaraha uu kula dagaallamo gool dhaliyaha City, laakiin joojintiisu waxay u baahan tahay foojignaan buuxda. Haaland wuxuu ku jiraa qaab ciyaareed wax burburiya, isagoo lix gool usoo dhaliyay xulkiisa, wuxuuna horay lix gool uga dhaliyay United sideed kulan.
2. Jérémy Doku vs. Noussair Mazraoui
Dhaawaca Omar Marmoush ayaa albaabka u furay Jérémy Doku. Garabkan degdega badan wuxuu fursado badan ka heli karaa daafaca United ee aan weli shabaqiisa ilaashan xilli ciyaareedkan. Wuxuu ka faa’iideysan karaa booska uu baneeyo Noussair Mazraoui oo weerarka ku biiraya. Difaaca reer Morocco waa inuu ahaado mid anshax difaac leh oo aan hore u ordin, loolankiisa hal-ka-halka ahna si weyn ayaa loo tijaabin doonaa.
3. Rodri vs. Bruno Fernandes
Bruno Fernandes ayaa la filayaa inuu door weerar oo sare ka ciyaaro maqnaanshaha Cunha. Weerarka United shaki la’aan isaga ayuu dhex mari doonaa. Rodri ayaa mar kale mas’uul ka noqon doona ilaalinta khadka dhexe ee City. Shaqadiisu waxay noqon doontaa in la ceejiyo Fernandes iyo Mbeumo marka ay kubadda helaan. Guuleystaha loolanka u dhexeeya labadan xiddig ayaa go’aamin kara natiijada ciyaarta. Haddii Rodri uu xakameeyo Fernandes, wuxuu meesha ka saari doonaa halista weerar ee ugu weyn United.
4. Benjamin Šeško vs. Rúben Dias
Benjamin Šeško wuxuu ku jiraa bilow aamusnaan ah, laakiin waxaa la filayaa inuu safto kulankiisii ugu horreeyay ee Premier League dhaawacyada Cunha iyo Mount awgood. Wuxuu la kulmi doonaa mid ka mid ah daafacyada adduunka ugu fiican, Rúben Dias. In kasta oo Dias uu yahay mid cajiib ah, daafaca City wuxuu u muuqday mid kala daadsan bilowgii xilli ciyaareedkan. Šeško ma doonayo inuu la galo loolan jireed Dias, laakiin wuxuu isku dayi doonaa inuu ka faa’iideysto hubanti la’aan kasta oo ka jirta daafaca City.