Ololaha kooxda Arsenal ee Champions League wuxuu ka bilaabanayaa gobolka Basque ee dalka Spain, iyagoo la ciyaaraya kooxda Athletic Club garoonka San Mamés. Labadan kooxood waxay iska hor yimaadeen xagaagan kulankii Emirates Cup, kaasoo ay Gunners si fudud 3-0 ugu adkaatay, laakiin caawa waxay filanayaan kulan aad uga adag.
Athletic Club, oo ah kooxdii kaalinta afraad ka gashay Spain xilli ciyaareedkii hore, waxay kusoo laabatay Champions League markii ugu horreysay tan iyo 2014-15. Labada kooxoodba waxay soo badiyeen seddex ka mid ah afartii kulan ee ay ciyaareen xilli ciyaareedkan.
Goorta & Goobta ay Tahay Ciyaarta?
- Goobta: Bilbao, Spain
- Garoonka: Estadio de San Mamés
- Taariikhda: Talaado, September 16, 2025
- Saacadda: 7:45 PM (Fiidkii) – Saacadda Geeska Afrika
Rikoodhka Fool-ka-Foolka ah
- Athletic Club: 0 Guulood
- Arsenal: 1 Guul
- Barbaro: 0
Kulankii Ugu Dambeeyay: Arsenal 3–0 Athletic Club (Aug. 9, 2025) – Emirates Cup
Warbixinta Labada Kooxood
Athletic Club
Dharbaaxada ugu weyn ee ku dhacday kooxda martida loo yahay waa maqnaanshaha xiddigooda ugu weyn, Nico Williams, kaasoo dhaawac muruqa ah ku seegaya kulankan. Waxaa sidoo kale ka maqnaan doona Beñat Prados, Unai Egiluz, iyo daafaca Yeray Álvarez oo ganaax ku jira.
Arsenal
Dhaawacyadu weli dhibaato ayay ku hayaan Arsenal. Kabtan Martin Ødegaard ayaa shaki ku jiraa inuu ciyaarayo kadib dhaawac garabka ah. Daafaca William Saliba ayaa la filayaa in la nasasiiyo kulankan. Waxaa weli si rasmi ah u maqan Bukayo Saka, Gabriel Jesus iyo Kai Havertz. Si kastaba ha ahaatee, waxaa la filayaa in isbeddel lagu sameeyo shaxda, iyadoo Ben White iyo Piero Hincapié ay kusoo bilaaban karaan.
Shaxaha La Filayo (Predicted Lineups)
Athletic Club (4-2-3-1): Simón; Areso, Vivian, Paredes, Berchiche; Vesga, Jauregizar; I. Williams, Sancet, Berenguer; Sannadi.
Arsenal (4-3-3): Raya; White, Mosquera, Gabriel, Hincapié; Zubimendi, Rice, Nwaneri; Madueke, Gyökeres, Eze.
Saadaasha Ciyaarta
Maqnaanshaha Nico Williams waa dharbaaxo weyn oo ku ah kooxda martida loo yahay. Garoonka San Mamés waa meel adag, laakiin Arsenal waa koox riyo xun ku ah iyaga.
Gunners waxay soo bandhigeen qaab ciyaareed cajiib ah Sabtidii, tababare Arteta wuxuu hadda haystaa koox u saamaxaysa inuu isbeddel sameeyo iyadoo aysan tayadu si weyn u dhimayn. Waxay leeyihiin khibrad ku filan oo ay kaga gudbaan caqabaddan.
Saadaashayda: Athletic Club 1 – 3 Arsenal