Dhacdo lama filaan ah oo indhaha soo jiidatay, tababaraha Real Madrid Xabi Alonso ayaa keydka geliyay xiddiga weyn ee Vinícius Júnior kulanka Champions League ee ay caawa la ciyaarayaan kooxda Marseille.
Tababaraha cusub ee Real Madrid ayaa dadka ka yaabiyay markii uu soo saaray shaxdiisa kulankan muhiimka ah. Kaliya ma uusan siin da’yarka Franco Mastantuono kulankiisii ugu horreeyay ee Champions League, laakiin wuxuu sidoo kale garabka bidix ee weerarka kusoo bilaabay Rodrygo halkii uu ka ahaa Vinícius Júnior.
Go’aankan ayaa imaanaya iyadoo Alonso uu marar badan ballanqaaday inuu isku shaandheyn ku samayn doono ciyaartoydiisa, taasoo ahayd wax uu si yar u samayn jiray tababarihii hore ee Carlo Ancelotti. Tababarihii hore ee Bayer Leverkusen wuxuu horay u muujiyay inuusan ka cabsanayn go’aanada waaweyn, isagoo labo jeer keyd geliyay saxiixa cusub ee Trent Alexander-Arnold.
Rodrygo, oo aan hal daqiiqo ciyaarin kulankii Real Sociedad ee dhammaadkii isbuuca, ayaa hadda helay fursad uu saameyn ku yeesho isagoo ka ciyaaraya booskiisa dabiiciga ah.
Dhanka kale, Vinícius Júnior wuxuu ku qasbanaan doonaa inuu keydka kasoo daawado marka ay kooxdiisu bilaabayso ololaheeda Champions League. Go’aankan waa mid adag marka la eego awoodda cajiibka ah ee uu weeraryahanku ku leeyahay tartankan.
Sannadihii ka dambeeyay bixitaankii Cristiano Ronaldo, Vinícius wuxuu ahaa mid ka mid ah ciyaartoyda ugu fiican ee Los Blancos ee tartamada Yurub. Wuxuu xitaa noqday ciyaaryahankii ugu da’da yaraa taariikhda ee goolal ka dhaliyay labo final oo Champions League ah.
Laakiin caawa, Alonso wuxuu kalsoonidiisa saaray Rodrygo, kaasoo rajeynaya inuu go’aanka tababaraha ku abaalmariyo goolkiisii ugu horreeyay ee tartan rasmi ah tan iyo bishii Maarso. Weerarka waxaa dhameystiraya Kylian Mbappé.