Daafaca Manchester United, Harry Maguire, ayaa ku adkeystay in shaxda 3-4-2-1 ee tababare Ruben Amorim aysan ahayn sababta ka dambeysa dhibaatada kooxda, wuxuuna taa beddelkeeda ku dooday in eedda ay saaran tahay ciyaartoyda.
Su’aalo ayaa laga keenay go’aanka Amorim ee ah inuu ku adkeysto nidaam taatiko oo aan u muuqan mid u anfacaya inta badan ciyaartoyda kooxdiisa, iyadoo si gaar ah loo dhaleeceeyay bannaanada ka dhalanaysa khadkiisa dhexe ee labada nin ka kooban.
Difaacistii Maguire ee shaxda
Maguire wuxuu si weyn u difaacay shaxda Amorim, isagoo ku adkeystay inay heshay dhaleeceyn aan caddaalad ahayn sababtoo ah natiijooyinka ayaan ahayn kuwo wanaagsan.
“Waxaan u maleynayaa in shaxdu ay tahay mid sahlan in la weeraro, sababtoo ah waxaan ciyaareynaa wax waxyar ka duwan qof walba,” ayuu u sheegay Sky Sports.
“Shaxdu way fiicnayd. Sidaan horay u sheegay, xerada ganaax ilaa xerada ganaax si raaxo leh ayaan ku jirnay kulan walba. Dhanka taatikada si raaxo leh ayaan ku jirnay kulan walba, waa inay saaranto ciyaartoyda. Ciyaartoydu waa inay qaataan daqiiqadahooda, waa inay faraqa ku sameeyaan daqiiqadahaas.”
“Waxaan u maleynayaa in afartii kulan ee ugu horreysay, aanan si fiican u samayn ‘daqiiqadahaas’. Sidoo kale si fiican kuma aanan difaacan xeradeena ganaaxa.”
Go’aanka adag ee Amorim
Amorim ayaa isna marar badan ku adkeystay inuusan qorsheyneynin inuu beddelo qaab dhismeedkiisa, isagoo xitaa u digay madaxda United inay ku qasbanaan doonaan inay ceyriyaan haddii ay doonayaan inay arkaan shax ka duwan.
“Qofna, xitaa Baadariga (Pope) ima beddeli doono,” ayuu yiri Amorim. “Tani waa shaqadeyda, waa mas’uuliyadeyda, waa noloshayda. Marka, taas ma beddeli doono.”
Hadallada Maguire waxay muujinayaan isku day lagu doonayo in cadaadiska laga yareeyo tababaraha, laakiin ugu dambeyn, waa natiijooyinka garoonka kuwa go’aamin doona mustaqbalka Amorim iyo shaxdiisaba.